T’ambla e me nji hint t’thartës n’do raste, dredhëzat janë nji ndër ushqimet ma t’përshatshme me u hangër kurdo, sido, sidomos kur e shohim edhe sa vlera ushqyese dhe përfitime ka ngranja e dredhëzave, duke përfshi këtu: vitaminën B dhe C, kalciumin, magnezin, fosforin, potasiumin, beta-karotenin dhe fosforin si disa nga vlerat kryesore.
Nuk don diskutim që dredhëzat munden lehtësisht me u kombinu n’ushqime t’ambla; kryesisht ambëlsina dhe pjekurina, por a ke provu ndonjiherë me i kombinu ato me ushqime t’njelmëta e perime? Nëse jo, atëherë ke gabu shumë dhe ke humbë shumë. Këtë gja mundesh me e ndrru e me i provu njanën prej 10 recetave t’maposhtme me dredhëza, e që nuk janë aspak tipike, por që shijojnë jashtëzakonisht shumë.
1. Pasta-sallatë me dredhëza
Nëse je merak n’pasta-sallata dhe je n’kërkim t’shijeve t’reja e unike, atëherë DUHESH me e provu pasta-sallatën me dredhëza; sallatë kjo që kryeson listën e 7 super pasta-sallatave t’kësaj vere. Kështu, pasta, dredhëza, djathë mocarella, gjethe t’freskëta menteje dhe nji dressing bashkohen për me ta ofru nji eksperiencë kulinare jo fort t’zakontë, por fort t’veçantë dhe plot shije,
2. Smoothie me dredhëza dhe spec t’kuq
Smoothie me spec t’kuq dhe dredhëza asht mënyra ma e mirë e mundshme me i përfshi edhe perimet n’smoothie, pa u vërejtë që janë aty, por t’u i marrë vitaminat e nevojshme. E këtë kombinim mundesh me ua ba gati fëmijëve për shkollë pa u tutë që nuk po e pijnë, sepse, kremoziteti dhe ambëlsia e këtij smoothie-t nime t’len pa fjalë.
Mundesh me e lexu edhe...
3. Tost frutash (dredhëzash) me jogurt
N’daç me nisë ditën ambël, mirë dhe lehtë, dije se ta kemi gjetë recetën ma t’shpejtë e ma t’shijshme t’mundshme t’tostit me fruta, specifikisht dredhëza dhe jogurt. Ky tost i plotëson t’gjitha kriteret për me u konsideru nji vakt i plotë dhe ngopës. Biles, mundet me u përgatitë kur t’hahet diçka e ambël e nuk don me ja tepru me kalori e sheqerna jo t’shnetshme.
4. Strawberry Margarita
Ideale për dreka e darka t’shoqnume me ushqim e pije meksikane, ky koktell asht prej atyne pijeve që ja vlenë me e përgatitë dhe me e shiju n’shoqinë e njerëzve që e dojnë dhe vlerësojnë t’banunit qejf me nji pije n’dorë, shumë muhabet dhe energji pozitive. E që mundesh me e ba edhe n’kushte shtëpije me pak harxh e dëshmon receta jonë e Strawberry Margaritas.
5. Salsa meksikane me dredhëza dhe avokado
Me u ndërlidhë tutje me kuzhinën dhe ushqimin meksikan, salsa me dredhëza dhe avokado asht nji prej atyre kombinimeve sa unike, aq edhe autentike meksikane t’cilën ja vlenë me e provu e me kombinu me çipsa tortille, për me i dhanë vehtës e t’tjerëve kafshata plot shije e freski, e që definitivisht ta rekomandojmë me e provu t’paktën nji herë meqë vërtetë mundet me t’pëlqy shumë si kombinim.
6. Smoothie me dredhëza dhe kungulleshë
Po kthehemi prap me nji kombinim t’pazakontë t’smoothie-ve, duke ta rekomandu smoothie-n me dredhëza dhe kungulleshë, sepse, përmes këtij kombinimi mundesh me marrë vlera ushqyese si prej dredhëzave, po aq edhe prej kungulleshave, pa pasë nevojë me hjekë dorë prej shijeve t’mira. Biles, ky smoothie asht ideal me ua përgatitë edhe vocërrakëve t’cilët nuk konsumojnë mjaftueshëm perime.
7. Sallata me rukollë dhe dredhëza
Njejtë sikurse edhe pasta-sallata me dredhëza, edhe sallata me rukollë dhe dredhëza asht prej atyne sallatave që nuk e din që t’u ka dasht’ n’jetë, po s’i provove. E asht gjynah me t’shku jeta pa e provu nji kombinim kaq simpatik e plot teksturë dhe shije sa acidike e t’ambël, po aq edhe tokësore e arrore.
8. Meze gjalpi me dredhëza dhe fruta t’tjerë mali
Kombinimi i gjalpit me fruta mali (përfshirë edhe dredhëzat) dhe fruta arrore ka arritë me e ba këtë meze kombinimin e preferum t’shumë njerëzve për mëngjeset dembele, por edhe darkat simpatike me miq, t’shoqnume me nji filxhan kafe. Madje, kjo meze asht perfekte edhe për ndeja speciale, sikurse janë ditëlindjet apo bachelorette party-t. E idenë që për me e qujtë meze duhet me kanë e parapame me u shoqnu me raki – mezja e gjalpit me fruta e ka gju n’ujë – me t’drejtë ama.
9. Tost me avokado dhe dredhëza
Kremoziteti dhe shija unike e avokados janë 2 cilësi që e komplementojnë secilën pjatë a shujtë, dhe padiskutimisht avokadoja kombinohet mirë e lehtë me shumë ushqime t’tjera, por a ke provu me kombinu avokadon me dredhëza? Nëse jo, atëherë mos e le pa e provu tostin me avokado dhe dredhëza – tost ky ideal për mëngjeset dembele, pauzat e shpejta apo mes-shujtat e rrasta.
10. Frose me dredhëza dhe pjeshkë
Birra e ftohtë n’ditë t’nxehtë e ka lezetin e vet e kjo nuk don aspak diskutim. Mirëpo, ka diçka që ja kalon birrave t’ftohta, veçanarisht nëse je prej tipave ekstravagant e eksperimentues n’shije: Frose-ja me dredhëza dhe pjeshkë – pije kjo që gërsheton n’mënyrën ma perfekte verën rozë t’akullësume me shijen e pjeshkës dhe dredhëzave.
Masi veç t’i kemi listu 10 super-receta ndryshe me dredhëza, po t’rekomandojmë që t’paktën njanës prej këtyre propozimeve me ua dhanë rastin e me e kërku. Mos harro se dredhëzat e ulin për 40% rrezikun e sëmundjeve t’zemrës. Andaj edhe asht mirë me ju ba vend n’receta t’tilla si këto t’tonat e me ja zgjatë vehtës kualitetin e jetës, por edhe me e ambëlsu vehtën me këtë super-frut. Shijo! /katror.info/
Përgatiti:
