Dita e djeshme ishte tejet e veçantë për Komunën e Kamenicës, e posaçërisht për adhuruesit e sportit të motoçikletave.
Kamenica ishte nikoqire e garës më të madhe të motocrossit, “Enduro extreme”, garë me pengesa brenda qytetit, e para këtij lloji në Kosovë.
Me një pistë të gjatë rreth 1.3 kilometra, qendra e qytetit të Kamenicës u shndërrua në një arenë garimi për mbi 100 pjesëmarrës nga e gjithë Kosova e rajoni, të cilët u bashkuan të garojnë, t’i testojnë aftësitë e tyre në motocross, si dhe ta shijojnë adrenalinën që ofron sporti i motocrossit.
Mundesh me e lexu edhe…
Sipas Behar Hysenit, zyrtar në Drejtorinë për Kulturë, Rini dhe Sport në Kamenicë interesimi për këtë garë ishte tejet i madh.
“Interesim ka pasur nga të gjitha trevat e Kosovës, por gjithashtu na janë bashkuar edhe pjesëmarrës edhe nga Maqedonia e Veriut”, u shpreh Hyseni për Katror.info.
Gjithashtu Hyseni theksoi se përgatitjet për këtë lloj garimi kanë filluar shumë herët.
“Ky organizim prestigjoz është realizuar në kuadër të aktivitetit “Kamenica Summer Fest”, përgatitjet për të cilin kanë filluar qysh në prill të këtij viti”, tregon Hyseni.
Në hapje të garës gjatë ditës së djeshme, Kryetari i Komunës së Kamenicës, Kadri Rahimaj u shpreh i lumtur që ishte pikërisht Kamenica ajo që “Për herë të parë në trojet shqiptare organizoi një garë të tillë, për ta vendosur një themel të fuqishëm të shtëpisë së re të motocrossit”.
Gjithashtu, gara e cila u nda në tri kategori, nxori edhe fituesit për të cilët u ndanë çmime nga 150 euro deri në 700 euro.
Në Kategorinë E1 dhe atë kryesore, vendi i parë i takoi Fidan Arifi, ndërsa vendi i dytë dhe i tretë i takoi Valmir Tahirit dhe Lirim Rexhajt.
Në Kategorinë E2, vendi i parë i takoi Eurolind Morinës, ndërsa i dyti dhe i treti u nda për Blerim Aliun dhe Besim Tërshanin.
Ndërsa në kategorinë E3 vendi i parë i takoi Elton Shevellit ndërsa vendi i dytë dhe i tretë u nda për Rami Ukën dhe Endrit Kastratin.
Kjo garë, e cila u mbajt në kuadër të “Kamenica Summer Fest”, u realizua me ndihmën e Federatës së Motoçiklizmit të Kosovës, Klubit “Kamenica Enduro”, KVRL-së, sponzorëve si RedRain, Rc Cola, Maxxis dhe Midland.
“Enduro Extreme” është veçanti e motoçikletave offroad që praktikohet zakonisht në mjedisin natyror me pengesa natyrore. Kjo lloj praktike ushtrohet edhe në pista artificiale dhe me pengesa shumë të vështira, të cilat kërkojnë një shkathtësi të madhe në motoçikletë dhe forcë të madhe fizike./Katror.info
Përgatiti:
