Distria Krasniqi është kampione olimpike në xhudo. Ka dy medalje nga kampionatet botërore, titull e medalje evropiane dhe shumë e shumë medalje nga garat e mëdha të xhudos. Prej së hënës është edhe xhudistja më e ranguar në botë. Udhëheq në renditjen botërore të të gjitha kategorive.
Por 27-vjeçarja synon suksese të reja. Ndër të tjera, synon atë që deri më tani nuk e ka arritur asnjë xhudiste.
“Te xhudistët ka kampionë olimpikë në dy kategori të ndryshme. Por te xhudistet nuk ka ende të tilla. Shpresoj që unë të jem e para. Synimi im është që në ‘Parisi 2024’ të jem në podium. Por gjithmonë shpresojmë dhe punojmë për të artën olimpike”, ka thënë Distria Krasniqi të martën për KOHËN.
Mundesh me e lexu edhe…
Në “Tokio 2020”, ngjarjen e mbajtur në vitin 2021, Distria fitoi medaljen e artë olimpike në kategorinë deri 48 kilogramë. Në vjeshtën e atij viti kaloi në kategorinë deri 52 kilogramë. Pra tani synon medaljen e artë olimpike në kategorinë e re. Dy të arta në kategori të ndryshme është sukses ende i paarritur te xhudistet.
Të premten Distria fitoi medaljen e argjendtë në Mastersin, në Budapest. Falë pikëve të fituara doli e para në ranglistën botërore. Ka më së shumti pikë prej të gjitha xhudisteve në botë – 8280. E dyta është japonezja Sazi Niizoe me 8.150 pikë. Niizoe i takon kategorisë deri në 70 kilogramë.
“Është ndjenjë shumë e mirë dhe jam shumë e lumtur që jam e renditur e para në botë për momentin, me më së shumti pikë nga të gjitha xhudistet”, ka theksuar Distria Krasniqi.
Ajo është e kënaqur me formën që po kalon. Thotë se forma është në rritje të vazhdueshme, ndërsa shton se ka shumë hapësirë për përmirësim.
“Është konkurrencë e çmendur dhe gjithmonë duhet të sjellësh risi”, thotë kampionia olimpike.
Japonezja Uta Abe dhe francezja Amandine Buchard janë rivalet e mëdha të Distrisë. Në fakt Abe vazhdon të jetë dominuese në kategorinë deri 52 kg. Krasniqi e Buchard janë të vetmet që e rivalizojnë. Distria humbi nga francezja në finale të Mastersit.
“Po punoj shumë bashkë me trajnerin Driton Kuka në analizimin e të gjitha kundërshtareve, në veçanti të japonezes dhe francezes. Janë dy superxhudiste. Gjithmonë luftërat me to janë shumë të vështira dhe vetëm detajet më të vogla vendosin fitoren mes nesh. Japonezja Abe po e bën diferencën në kategorinë time. Por kjo më motivon edhe më shumë që të punoj për ta mposhtur aty ku duhet”, ka thënë Distria Krasniqi.
Trajneri Kuka është i njohur që xhudistët i përgatit që të arrijnë kulmin e formës në ngjarjet më të rëndësishme. I gjithë fokusi i tij është te Lojërat Olimpike, ngjarja më e madhe në sport. Dhe nuk përjashtohet një finale mes Distrisë dhe Uta Abes në “Parisi 2024”, ku natyrisht xhudistja kosovare do ta kërkonte suksesin.
Aktualisht Kosova i ka pesë xhudistë brenda zonës që siguron normë olimpike. Të gjithë pritet të jenë në Paris verën e ardhshme. Medalje të tjera synohen, ndërsa Distria është prej adutëve më të mëdhenj./Koha.net/Katror.info
Përgatiti:
