Në një intervistë për albinfo.at, avokati Mirsad Musliu tregon për migrimin e tij në Austri, shkollimin dhe punën profesionale që ai e bën si avokat në Vjenë. Po ashtu, ai tregon se si e ka mbrojtur, në dy raste në Vjenë, Republikën e Kosovës
Mirsad Musliu është avokat i njohur, jo vetëm nga komuniteti shqiptar por në gjithë Austrinë. Ai është nga fshati Çegran i komunës së Gostivarit. Shkollën fillore deri në klasë të pestë e ka përfunduar në vendlindje. Në vitin 1994 iu bashkohet prindërve të tij, në Grac të Austrisë. Aty, ai përfundon gjimnazin dhe fakultetin Juridik në “Karl Franzens Universitet”. Pas praktikave në gjykata të ndryshme në Grac e rrethinë, z.Musliu në vitin 2010 punësohet në Ministrinë e Brendshme, në Vjenë. Dy vite më vonë, në shkurt të vitit 2012, Mirsad Musliu, fillon të punojë në zyrën juridike të avokatit Mag.Nikolaus Rast, me të cilën tashme janë partner në zyrën e tyre “Rast&Musliu Rechtsanwälte”, në Vjenë.
Avokati Musliu dhe zyra e tij merret me lëndë të ndryshme, duke filluar nga krimet e rënda deri tek lëndët për të drejtat e të huajve si: rregullimi i nënshtetësisë, rregullimi i lejeve të qëndrimit në Austri, heqja e ndalimit në Austri, e drejta e migrimit, e drejta familjare, etj.
Mundesh me e lexu edhe…
Por, për Musliun këto arritje nuk ishin të thjeshta, pasi kur filloi shkollimin nuk e njihte gjuhën.
‘’Më kujtohet si sot dhe kurrë nuk do e harroj, kur fillova shkollimin në Grac. Nuk e njihja gjuhën gjermane fare. Thuajse çdo ditë pas mësimit të rregullt, më duhej të ndiqja kurse shtesë për të mësuar gjuhën gjermane. Megjithatë, pasi që kisha njohuri të gjuhës serbo-kroate dhe kisha bashkënxënës në klasë nga ish-Jugosllavia, ata përpiqeshin të më përkthenin dhe të më ndihmonin që të kuptoj mësimet apo detyrat e shtëpisë. Të vijoj mësimet në gjermanisht, në atë kohë më dukej një gjë e pamundur, por, me vullnet të fortë dhe disiplinë arrihet çdo gjë’’, ka thënë ai.
Avokatura nuk ishte ëndrra e fëmijërisë së Musliut. Që i vogël ai ëndërronte të bëhej mjek, mirëpo arsyeja e zgjedhjes së këtij profesioni ishte fakti se jepte shumë mundësi punësimi si në: politikë, administratë ose organe tjera shtetërore.
‘’Ëndrra ime ka qenë të studioj mjekësinë. Më vonë, dëshiroja të bëhem pilot. Asnjëherë nuk e kam menduar se do të bëhem avokat. Kur mbarova gjimnazin në Grac, akoma nuk kisha vendosur se çfarë do të studioj, por isha i vendosur për të studiuar. Fillova studimet në Juridik, se është një lëmi që të jep shumë mundësi punësimi si në: politikë, administratë ose organe tjera shtetërore’’, shton ai.
E ndërsa, mundësitë e punësimit janë të mëdha, megjithatë, rrugëtimi deri tek tituli avokat ka sfida të mëdha.
‘’Është fakt që studimet e fakultetit Juridik në Austri nuk janë edhe aq të lehta. Në dy vitet e para bëhet një seleksionim, ku mbi 65% te studentëve dorëzohen dhe ndërrojnë drejtimin. Edhe pse thuhet se juridiku është një lëmi e thatë, unë nuk mund të konfirmoj këtë. Juridiku ka shumë të bëjë më logjikën, sistemin e të menduarit, po ashtu edhe me fantazinë e studentit. Padyshim se do të derdhësh djersë të ngrohta dhe të ftohta gjate studimeve në këtë fakultet. Një sfidë ende më e madhe është provimi i avokatisë. Në këtë provim, i ke 3 provime me shkrim prej 8 orësh, dhe provimin gojarisht para komisionit, që zgjat 4 orë. Komisioni përbëhet prej 2 gjykatësve supremë të Austrisë dhe 2 avokatëve, të cilët katër orë të plota të pyesin për çdo segment të juridikes. Ky provim kërkon përgatitje prej katër muajsh nëse çdo ditë mëson nga 12-14 orë’’, thotë ai.
Musliu, profesionin e avokatisë e ushtroj prej 1 shkurtit të vitit 2012, ku kryesisht merret me lëndë të krimeve të rënda dhe penale. Ndërsa zyra e tij është adresë për shumicën e shqiptarëve.
‘’Unë përfaqësoj pjesën dërmuese të komunitetit shqiptar në Austri. Po ashtu jam përfaqësues i Ambasadës së Republikës së Shqipërisë, Kosovës dhe Maqedonisë së Veriut. Komuniteti shqiptar ballafaqohet me probleme të ndryshme, qofshin ato penale, civile apo administrative. Më së shumti drejtohen për rregullimin e lejeve të qëndrimit për bashkim familjar, për heqjen e ndalesave të hyrjes në Austri dhe zonën shengen, për divorcime, ndeshje trafiku, dënime në komunikacion por kemi raste sigurisht edhe për lëndë penale, si: vrasje, trafikim të lëndëve narkotike apo për vepra të tjera penale’’, u shpreh Musliu për Albinfo.ch, përcjell Katror.info.
Përgatiti:
