Aktivistet që mbështesin kauzat për të drejtat e njeriut

Krijimi i një shoqërie gjithëpërfshirëse, që i trajton njerëzit në mënyrë të barabartë është thelbësore për të pasur një mjedis të shëndetshëm dhe demokratik. E krijimi i këtij mjedisi është edhe më thelbësor kur bëhet fjalë për personat me aftësi të kufizuar.

Kështu, si shumë organizata të tjera të cilat dalin në përkrahje të këtij komuniteti, promovimin e punësimit, shkollimit, integrimit dhe trajtimit të barabartë të personave me aftësi të kufizuara, tash e 10 vjet po e bën organizata You Can Do përmes projekteve e aktiviteteve të shumta.

“Aktivitetet që organizata i ndërmerr janë përgatitja e të rinjve në gjuhët e huaja, në çështjen e teknologjisë, mësimin e kompjuterit dhe telefonave të mençur, përgatitja e të rinjve për Universitet të Prishtinës, për punësimin e tyre dhe gjëra të tjera për ata që kanë nevojë,” thotë Jusuf Fazliu, drejtues i OJQ You Can Do.

Jusufi shpjegon se misioni kryesor i kësaj organizate është integrimi në shoqëri i personave me aftësi të kufizuar, në veçanti të rinjve. E drejt përmbushjes së këtyre qëllimeve, sipas tij rol të rëndësishëm kanë pasur të rinjtë vullnetarë.

“Ne si organizatë e kemi pasur fatin që qe tri vite, të cilët nuk na janë nda për çdo aktivitet të mundshëm… Këta merren me çështjen e shkrimit të projekteve, me çështje të lëvizjes kur kemi takime të ndryshme dhe me çdo gjë organizata e merr, me çdo aktivitet që e ka organizata, vullnetarët janë të përfshirë në ndihmën tonë që ne t’i realizojmë aktivitetet dhe projektet në mënyrën ma të mirë,” shprehet Fazliu.

E pyetur se sa ndihmon angazhimi i vullnetarëve, drejtoresha e kësaj organizate, Merita Hasani shprehet:

“Vullnetarët kanë një rol kyç në organizimin e projekteve dhe aktiviteteve tona, për arsye se vërehet shumë vullneti, puna e angazhimi i tyre, sidomos kur jemi vazhdimisht duke punuar me persona me aftësi të kufizuar, persona të verbër të cilët e përbëjnë shumicën e organizatës dhe kanë nevojë vazhdimisht për shoqërues për shkak të kushteve të këqija që shteti jonë i ofron për këta persona,” thotë Hasani.

E ani pse është sfiduese të gjenden vullnetarë që duan të përkrahin dhe mbështetin iniciativat që lidhen me mirëqenien dhe të drejtat e personave me aftësi të kufizuara, organizata ka gjetur mënyra për të zgjuar interesimin e të rinjve për punë vullnetare.

Merita shpjegon se përgjatë tri viteve të fundit You Can Do hap thirrje për vullnetarë dhe e bën shpërndarjen e tyre edhe në universitete e fakultete të ndryshme duke targetuar kështu studentë nga fusha të ndryshme.

“Ne kemi pritur e përcjellë shumë vullnetarë. Besoj që numri mund të jetë dikur afro 30-40 vullnetarë të cilët kanë qenë të angazhuar në projekte të shumta,” tha ajo.

Hasani shpjegon se rrugëtimin në You Can Do edhe ajo e ka nisur si vullnetare dhe shprehet se angazhimi i saj asokohe e ka nxitur të kuptojë rëndësinë e angazhimit dhe të avokuarit për një kauzë.

” Çdo njeriut i vyen një kauzë në jetë për të cilën duhet me luftu; për të mirën e vendit të vet, për të mirën e një komuniteti të cilin ti në baza vullnetare e ndihmon. Besoj që ajo ndjenja që ti ke përmirësu një jetë apo një çështje të caktume është shumë e mirë.”

E Meritës, Jusufit dhe pjesëtarëve të tjerë të organizatës i ka dalë për dy vite me radhë në ndihmë edhe Saranda Krasniqi, menaxherja e projekteve e cila kryesisht punon në baza vullnetare. Kështu, ajo na shpjegon se si e nisi këtë rrugëtim.

“Qysh e vogël e kam mendu veten me i ndihmu njerëzit pavarësisht moshës apo gjinisë që i përket edhe në momentin që e kam pa që janë persona me aftësi të kufizume kam mendu që tash e kam një mundësi me u ba e dobishme për komunitetin… Aktivitetin e parë (si vullnetare) e kam mbajtur në datën e 3 dhjetorit që është “Darka e errët” e që në organizatën tonë tashmë është një traditë,” thotë Saranda Krasniqi, menaxhere e projekteve në You Can Do.

E pyetur rreth sfidave me të cilat ajo dhe aktivistët e vullnetarët e tjerë përballen, Saranda shpjegon se sfida më e madhe është të qëndruarit të motivuar dhe stoik ndaj një kauze a problematike, ani pse në shumicën e rasteve ato nuk merren parasysh nga institucionet. Mirëpo, këto nuk e ndalin atë dhe miqtë e saj.

“Kjo të demotivon në një farë forme, por kur i sheh personat me aftësi të kufizume dhe i dëgjon prapë ankesat e tyre, komplet i mbledh forcat që i ke dhe vazhdon para me kërkesa të reja. Mundohesh me mbajt aktivitete, trajnime, çka do qoftë,” tha Saranda Krasniqi.

Kështu, edhe përgjatë “Javës Ndërkombëtare të Shkopit të Bardhë” e cila me një marsh u shënua më 15 tetor, Saranda bashkë me pjesëtarët e tjerë të organizatës, anëtarët dhe vullnetarët kanë ngritur zërin rreth problemeve dhe sfidave me të cilat përballen personat e verbër dhe me shikim të dobësuar, duke u bërë thirrje institucioneve për vendosjen e pllakave taktile, sinjalizuesve në pritore të autobusëve dhe brenda tyre./Katror.info

Edicionin #26 të plotë e gjeni KËTU 🙂