Për sa i përket sipërfaqes, vendi më i vogël në pjesën juglindore të kontinentit aziatik, Singapori karakterizohet si qytet-shtet.
Për faktin se pozicioni që zë është jashtëzakonisht i rëndësishëm nga pikëpamja strategjike, ai shpesh njihet si Gjibraltari aziatik.
Emri i këtij qyteti-shtet është përkthyer lirshëm si “Qyteti i Luanit” dhe ekziston një teori veçanërisht interesante për origjinën e këtij emri. Gjegjësisht, besohet se emri Singapor vjen nga dy terma sanskrite dhe se është krijuar gjatë shekullit të 14-të.
Mundesh me e lexu edhe…
Një princ nga Sumatra, i quajtur Sang Nil Utham, zbarkoi në zonën e Singaporit të sotëm dhe pa një kafshë në breg, por nuk ishte i sigurt se cila ishte. Mirëpo, shoqëruesi i tij vlerësoi se bëhej fjalë për një luan, ndonëse kërkimet e mëvonshme përcaktuan se në asnjë rast nuk mund të ishte një luan, sepse në atë zonë nuk kishte jetuar ndonjëherë ndonjë lloj luani i njohur, por me shumë mundësi ishte një tigër.
Atraksioni i parë që hasin turistët kur vizitojnë Singaporin është padyshim aeroporti “Jewel Changi”. Përveç më shumë se 280 restoranteve dhe dyqaneve të mallrave të ndryshme, ka një ujëvarë brenda aeroportit të Singaporit, si dhe një zonë të destinuar për të luajtur udhëtarët më të vegjël.
Jo më pak interesant në këtë qytet-shtet është edhe kopshti botanik, i cili, siç thekson “Timeout”, është përfshirë në Listën e Trashëgimisë Botërore të UNESCO-s.
Është veçanërisht interesante të theksohet se koleksioni i orkideve, që ekziston në këtë kopsht botanik, është më i madhi në të gjithë botën, duke pasur parasysh se përfshin rreth një mijë lloje të kësaj luleje të pazakontë dhe rreth dy mijë lloje të modifikuara. Në liqenin brenda këtij kopshti mund të shihen mjellma të zeza australiane, si dhe “Vanda Miss Joaquim”, e cila është lulja kombëtare e Singaporit.
Në fundjavë organizohen koncerte shumë interesante në ambient të hapur në Kopshtin Botanik të Singaporit, si dhe është një hapësirë e dekoruar bukur dhe veçanërisht tërheqëse e destinuar për vizitorët më të rinj.
Duke marrë parasysh se mbulon një sipërfaqe prej rreth 28 hektarësh, një turne i detajuar në kopshtin zoologjik të Singaporit është shpesh një aventurë gjithë ditore. Ai është i ndarë në gjithsej 11 zona dhe është shtëpia e më shumë se katër mijë kafshëve.
Ajo që e bën të veçantë këtë kopsht zoologjik është i ashtuquajturi koncept i hapur dhe është i pari kopsht zoologjik në botë që e ka vënë atë në praktikë.
Kolonia më e madhe e orangutanëve që jeton në kushte të tilla në të gjithë botën mund të shihet pikërisht në këtë kopsht zoologjik, dhe vizitorët kanë në dispozicion një sërë atraksionesh virtuale, si dhe mundësinë për të parë një tigër të bardhë, i cili është një nga speciet e rralla, ose për të ecur nëpër pyllin e shiut gjatë orëve të mbrëmjes./Katror.info
Përgatiti:
