Gjiganti amerikan i teknologjisë, Amazon, ka njoftuar një tjetër valë shkurtimesh, duke prekur rreth 14,000 pozicione korporative, në përpjekje për të reduktuar burokracinë dhe për të rritur përdorimin e inteligjencës artificiale (AI).
Në një deklaratë për mediat, kompania theksoi se këto ndryshime janë pjesë e përpjekjeve për të “hequr shtresa menaxheriale të panevojshme, për të thjeshtuar proceset dhe për të zhvendosur burimet drejt fushave më strategjike për nevojat aktuale dhe të ardhshme të klientëve tanë.” Punonjësit e prekur nga vendimi do të kenë 90 ditë afat për të aplikuar për role të reja brenda kompanisë, ndërsa Amazon ka bërë të ditur se do të ofrojë mbështetje tranzitore dhe pagesa dëmshpërblimi për ata që do të dalin nga puna.
Edhe pse kompania nuk specifikoi cilat departamente do të preken më shumë, Reuters raportoi se zakonisht shkurtime të tilla kanë ndodhur në departamentet e cloud-it, shitjeve me pakicë, komunikimit dhe pajisjeve. Kjo është vala më e fundit e një procesi më të gjerë reduktimesh: që prej vitit 2022, Amazon ka shkurtuar mbi 27,000 vende pune në total. Në nivel global, kompanitë e mëdha teknologjike po ndjekin një trend të ngjashëm, reduktimin e burokracisë dhe automatizimin përmes inteligjencës artificiale. Megjithatë, ndërsa shpenzimet për AI po rriten, kjo i detyron kompanitë të shkurtojnë kosto diku tjetër, përfshirë stafin, vërejnë analistët.
Mundesh me e lexu edhe…
CEO i Amazon, Andy Jassy, paralajmëroi në qershor se automatizimi i proceseve të përsëritura dhe rutinore do të çonte në shkurtime të mëtejshme, duke e cilësuar këtë si një pjesë të domosdoshme të tranzicionit teknologjik. Sipas The New York Times, kompania madje po planifikon të zëvendësojë mbi gjysmë milioni vende pune me robotë, bazuar në dokumente të brendshme. Në raportin tremujor të korrikut, Jassy shtoi: “Automatizimi dhe robotika janë elementë thelbësorë për përmirësimin e efikasitetit të kostove dhe krijimin e përvojave më të mira për klientët në kohë.”
Sipas faqes layoffs.fyi, që monitoron shkurtime në sektorin teknologjik, mbi 200 kompani kanë shpallur më shumë se 120,000 shkurtimet që nga fillimi i vitit, përfshirë 15,000 vende pune në Microsoft dhe 22,000 në Intel. Krahasuar me vitin 2024, kur rreth 153,000 punonjës u prekën nga shkurtimet në mbi 500 kompani, viti 2025 po ndjek një trend të ngjashëm. Megjithë lajmin për shkurtime, aksionet e Amazon u rritën me 1.2% të hënën. Kompania pritet të publikojë raportin e saj financiar për tremujorin e tretë këtë të enjte. /BM/Katror.info
