Afati për aplikim në skemën e granteve për bizneset mikro, të vogla dhe të mesme është përmbyllur më 26 maj, ndërsa deri në atë datë janë dorëzuar rreth 1 mijë aplikime në Ministrinë e Industrisë, Ndërmarrësisë dhe Tregtisë. Kjo skemë, e cila synon të shpërndajë fonde në vlerë prej 5 milionë eurosh për sektorin prodhues, ka zgjuar interesim të madh në mesin e bizneseve në Kosovë, shkruan Katror.info.
Lajmin e ka bërë të ditur Zef Dedaj, ushtrues detyre i drejtorit të përgjithshëm të KIESA-s, gjatë një interviste në emisionin “Info Plus” në RTK. Ai e ka cilësuar këtë skemë si një ndër më të mëdhatë jo vetëm për nga vlera financiare, por edhe për rëndësinë strategjike që ka për zhvillimin industrial në vend. Sipas tij, përmes kësaj skeme mbështeten nëntë sektorë të përcaktuar në kuadër të politikës industriale, me qëllim që të përkrahen bizneset për blerje të makinerive të avancuara, duke ndikuar kështu në rritjen e kapaciteteve prodhuese dhe përpunuese.
Thirrja për aplikim ka qenë e ndarë në tri kategori, sipas madhësisë së bizneseve. Kompanitë me deri në nëntë të punësuar kanë pasur mundësinë të aplikojnë për mbështetje deri në 40 mijë euro. Bizneset me nga 10 deri në 49 të punësuar kanë mundur të kërkojnë mbështetje deri në 80 mijë euro, ndërsa ato me 50 deri në 249 punëtorë kanë pasur të drejtë të aplikojnë për grante deri në 120 mijë euro.
Mundesh me e lexu edhe…
Dedaj theksoi se kriteret për aplikim kanë qenë të qarta dhe se gjatë fazës së parë është zbatuar një qasje me zero tolerancë për mospërputhje. Bizneset kanë qenë të obliguara të dorëzojnë dokumentacion të plotë, përfshirë certifikatën e regjistrimit, dëshmi që nuk janë nën hetime apo në procedura falimentimi, certifikata nga ATK që dëshmojnë numrin e të punësuarve dhe qarkullimin, si dhe xhirollogarinë bankare./Katror.info
