Një studim i përbashkët nga Universiteti i Kyushus në Japoni dhe Universiteti i Torontos ka nxjerrë në pah ndikimin pozitiv që mund të ketë aktiviteti fizik në lehtësimin e kujtimeve traumatike dhe varësisë ndaj substancave.
Eksperimentet u zhvilluan te minjtë, të cilët ishin ekspozuar ndaj tronditjeve elektrike për të simuluar simptoma të çrregullimit të stresit post-traumatik (PTSD), përfshirë ndjesinë e frikës, ankthin dhe shmangien e ambienteve të lidhura me traumën.
Pas përfshirjes në aktivitet fizik, u vu re një rritje e prodhimit të neuroneve në hipokampus — një zonë kyçe e trurit e përfshirë në proceset e kujtesës. Kjo rritje e neurogjenezës u shoqërua me ulje të dukshme të simptomave të traumës.
Mundesh me e lexu edhe…
Studiuesit provuan gjithashtu ndërhyrje gjenetike për të nxitur prodhimin e neuroneve, të cilat dhanë efekte pozitive, megjithëse më të dobëta krahasuar me ndikimin e aktivitetit fizik.
Rezultate premtuese u regjistruan edhe në një grup tjetër minjsh me shenja të varësisë ndaj kokainës. Pas stimulimit të neurogjenezës, minjtë nuk e kërkonin më dhomën e lidhur me përvojën e përdorimit të substancës.
Sipas shkencëtarëve, këto zbulime mund të kontribuojnë në zhvillimin e trajtimeve të reja për PTSD-në dhe varësitë, përmes ndikimit në rrjetet nervore të trurit.
Deri në avancimin e trajtimeve të mundshme, aktiviteti fizik mbetet një ndër mënyrat më të thjeshta, të sigurta dhe të qasshme për të përmirësuar mirëqenien mendore dhe për të ndihmuar në përballimin e traumës dhe varësive. /Katror.info
Përgatiti:
