Alban Nevzati, ka lindur në vitin 1980 në Prishtinë, ndërsa ka jetuar në Prizren, ku dhe e ka përfunduar klasën e katërt të shkollës fillore. Në Zvicër ka ardhur në vitin 1990, ku e ka vazhduar shkollën fillore dhe gjimnazin. Studimet në drejtimin ekonomi dhe menaxhment i ka përfunduar në Zürich, në vitin 2006.
Alban Nevzati punon në Departmentin e Kontrollit të Rreziqeve, gjegjësisht në repartin e menaxhimit të zhvillimeve strategjike (Change Management), repart global me rreth 400 punëtorë të bankës UBS, më të madhes në Zvicër dhe njërës ndër më të mëdhatë në botë.
Në intervistën për albinfo.ch ai flet rreth pranisë së shqiptarëve në bankat e Zvicrës, karrierës së tij të deritashme, shoqatës që bashkon punonjësit bankarë në Zvicër dhe tema që lidhen me fushën ekonomike në përgjithësi.
Mundesh me e lexu edhe…
Kryçja në këtë industri për Albanin nuk ka qenë edhe aq e vështirë pasi sipas tij, Cyrihu ofron shumë mundësi në këtë drejtim.
“Cyrihu, pas Londrës, është qendra e dytë me e madhe bankare në Europë. Kështu që kyçja në këtë industri nuk ishte ndonjë vendim i vështirë për mua”, thotë Alban Nevzati, bartës i një posti me përgjegjësi të lartë në bankën më të madhe të Zvicrës, UBS.
Albani gjithashtu shpalosi se si filloi të punonte në sistemin bankar në Zvicër, që njihet edhe si “vendi i bankave” dhe për më tepër në Cyrih që është një prej qyteteve kryesore në sistemin global bankar.
“Qysh gjatë studimeve në Universitetin e Zürichut kam punuar në një bankë private. Përvojat të cilat i kam mbledhur në atë bankë, e cila ishte bankë private klasike, më kanë ndihmuar edhe gjatë studimeve të mia. E kisha më lehtë ta bëj një lidhje mes teorisë dhe modeleve të ndryshme ekonomike në njërën anë, dhe aplikimin e tyre në botën reale. Përvoja e punës gjatë studimeve në botën reale bankare më ka bërë të krijoj një fije skepticizmi dhe rezerve ndaj teorive dhe modeleve të ndryshme ekonomike, por njëkohësisht ma ka rritur interesin për njohurinë a po atyre modeleve teorike”, tregon Alban Nevzati.
Ndonëse ka krijuar shumë përvojë në sistemin bankar, Albani thotë se i ka mbetur besnik të njejtës bankë qysh nga përfundimi i studimeve.
“I kam mbetur besnik bankës së njejtë në të cilën fillova të punoj pas studimeve. Bankat globale, si kjo ku unë punoj, ofrojnë një llojllojshmëri të drejtimeve të ndryshme profesionale. Unë punoj në departmentin e kontrollit të rreziqeve. Kontrolli i rrezikut është një punë në mbrapavijë ku kontrollohen rreziqet në divizionet e ndryshme të bankës. Aktualisht punoj në repartin e menaxhimit të zhvillimeve strategjike (Change Management), repart global me rreth 400 punëtorë”, thotë Alban Nevzati.
Albani gjithashtu tregoi edhe për karakteristikat e sistemit bankar zvicerean, që e bëjnë të dallohet nga sistemet e vendeve tjera.
“Sistemi bankar zviceran ka përfituar shumë nga stabiliteti politik i Zvicrës, posaçërisht gjatë luftës së ftohtë. Po ashtu bashkëpunimi i ngushtë mes institucioneve arsimore, qofshin ato universitare ose shkollave profesionale dhe bankave, ka pasur një ndikim të madh në avansimin e sistemit bankar. Kërkesat e sektorit bankar për kuadro të përgatitura janë mbuluar nga sistemi arsimor i Zvicrës. Po ashtu edhe niveli i lartë i jetës dhe i arsimit ka ndikuar që Zvicra të joshë gjithnjë ekspertët më të mirë nga e gjithë bota”, rrëfen Albani.
Ndërsa kur u pyet nëse është në dijeni për numrin e shqiptarëve që punojnë në banka dhe institucione financiare në Zvicër, ai thotë se ky numër është shumë i lartë.
Vetëm në institutin në të cilin punoj unë, janë qindra shqiptarë! Po ashtu numri i shqiptarëve në institucionet tjera bankare është i madh dhe në rritje e sipër. Shqiptarë mund të gjejmë tani në çdo funksion në banka: Në sportele të bankave, në IT, në Investment Bank, në Asset Management, në menaxhim të fondeve, në menaxhim të resurseve humane (HR), kuadro të larta lobuese, në thesar, kuadro me përgatitje kuantitative, aso me përgjegesi të lartë menaxheriale etj./Katror.info
Marrë nga Albinfo.
Përgatiti:
