Ambasadori i BE-së në Kosovë, Aivo Orav, ka deklaruar se është i përkushtuar të ndihmojë Kosovën të afrohet sa më shumë me Bashkimin Evropian.
Në një opinion të publikuar në faqen zyrtare të Zyrës së BE-së në Kosovë, Orav ka theksuar se vullneti i qytetarëve të Kosovës është i qartë, ashtu si edhe vizioni i BE-së për Ballkanin Perëndimor.
“Vullneti i popullit të Kosovës është i qartë, ashtu siç është edhe vizioni i BE-së për Ballkanin Perëndimor: e ardhmja e rajonit është në BE. Së bashku, duam të ecim përpara drejt këtij qëllimi të përbashkët, ” ka theksuar ai.
Mundesh me e lexu edhe…
Ai ka shkruar se si dikush i ri në Kosovë, me vetëm katër muaj në detyrë, u impresionua kur mësoi rezultatet e një sondazhi të porositur nga BE-ja, i cili tregoi se 92% e të anketuarve mbështesin anëtarësimin e Kosovës në BE.
“Kosova gjithashtu shfaq qëndrimet më pozitive ndaj BE-së, me 91% të të anketuarve që shprehin një qëndrim të favorshëm. Çfarë mjedisi mikpritës për një Ambasador të BE-së!”
Tutje, ai ka shkruar se Samiti i fundit BE-Ballkani Perëndimor tregoi një vrull të ri për “partneritetin tonë strategjik dhe një dinamikë të re të procesit të zgjerimit.”
“Presidenti i ri i Këshillit Evropian, António Costa, e përshkroi zgjerimin si investimin më të rëndësishëm gjeopolitik të BE-së – një investim në paqe dhe mirëqenie për të gjithë popujt. Dhe pikërisht kjo është: një investim në të ardhmen tonë të përbashkët.”
Ambasadori shtoi se për ta realizuar këtë, si BE-ja ashtu edhe shtetet aspirante për anëtarësim duhet të jenë të përgatitura. BE-ja duhet të bëjë reformat dhe përgatitjet e nevojshme të brendshme, ndërsa anëtarët e ardhshëm duhet të shtojnë përpjekjet e tyre për reforma.
“Integrimi gradual i rajonit tashmë ka filluar në shumë fusha. Plani i Rritjes prej 6 miliardë eurosh është një shembull i shkëlqyer – një mjet që do t’u mundësojë partnerëve tanë të Ballkanit Perëndimor, përfshirë Kosovën, të përfitojnë nga integrimi i pjesshëm në Tregun e Vetëm të BE-së edhe para anëtarësimit të plotë në BE,” ka shkruar ambasadori Orav.
“Plani i Rritjes gjithashtu do të nxisë reformat e lidhura me BE-në, pasi pagesat nga Instrumenti i Reformave dhe Rritjes do të bëhen pas përmbushjes së hapave të reformave të dakorduara, të përcaktuara në Agjendën e Reformave të Kosovës. Në total, më shumë se 880 milionë euro janë në dispozicion për zbatimin e kësaj agjende.”
“Duke pasur parasysh këtë, mesazhi im për Kosovën është të shfrytëzojë plotësisht Planin e Rritjes, të zbatojë Agjendën e saj të Reformave dhe të afrohet më shumë me BE-në. Zgjerimi është një proces i bazuar në meritë, dhe ritmi i integrimit është gjithashtu në duart e Kosovës. Ai do të varet nga përgatitja dhe performanca e saj në zbatimin e reformave të nevojshme.”
Si partneri më i madh tregtar, investitor dhe ofrues i ndihmës financiare i Kosovës, BE-ja do të vazhdojë ta mbështesë Kosovën në procesin e saj të reformave, ka shkrua ri duke shtuar se procesi i reformave nuk ka të bëjë vetëm me përfitimin e fondeve të Planit të Rritjes apo anëtarësimin në BE, por ai ka të bëjë me zbatimin e reformave demokratike dhe ekonomike për një Kosovë më të mirë; ka të bëjë me garantimin e një jete më të mirë për popullin e Kosovës.
“Në këtë frymë, BE-ja gjithashtu dëshiron të shohë një zgjidhje të qëndrueshme për situatën në veri të Kosovës, një vend ku të gjitha komunitetet jetojnë krah për krah në siguri dhe qetësi, ndihen të përfaqësuar nga ata që janë në pushtet dhe marrin shërbime publike të mirëfillta.”
Ai ka shkruar edhe per zgjedhjet e vitit 2025 dhe rëndësinë e integritetit të informacionit.
“Një proces zgjedhor transparent, i administruar mirë, gjithëpërfshirës dhe konkurrues është kyç për çdo shoqëri demokratike. Por një element tjetër po aq kritik për çdo proces zgjedhor është integriteti i informacionit dhe qasja e votuesve në informacion të saktë, të besueshëm dhe autentik.”
“Gjatë katër muajve të fundit, kam shërbyer si urë lidhëse mes BE-së dhe Kosovës, duke promovuar marrëdhënie më të thella diplomatike, ekonomike, zhvillimore dhe kulturore. Rezoluta ime për Vitin e Ri është të njoh më mirë Kosovën dhe kosovarët dhe të ndihmoj në afrimin e mëtejshëm të Kosovës me BE-në.
Dëshira ime për vitin 2025 është që të jetë një vit i mbushur me prosperitet, paqe, shëndet, bashkëpunim dhe unitet në diversitet,” ka shkruar ai. /Katror.info
Përgatiti:
