Nga të gjitha qytetet italiane të shpopulluara që kanë nisur skema për shitjen e shtëpive me çmime simbolike vitet e fundit, asnjëra nuk ka pasur më shumë sukses sesa Sambuca di Sicilia, në Sicili.
Shitjet e shtëpive në Sambuca kanë pasur kërkesa të mëdha, ku blerës amerikanë nxituan të blejnë shtëpi me çmime simbolike prej 1 euro në vitin 2019 dhe 2 euro në vitin 2021.
I panjohur më parë, edhe për disa italianë, Sambuca ka mirëpritur aq shumë amerikanë sa që është quajtur “Amerika e Vogël e Italisë.”
Mundesh me e lexu edhe…
Por, sipas kryetarit të bashkisë së qytetit, Giuseppe Cacioppo, ky trend i blerësve nga SHBA-ja ka ndryshuar ose të paktën është ngadalësuar. Tani, italianët janë ata që po blejnë shtëpitë e braktisura të qytetit.
‘Amerika e Vogël e Italisë‘
Sambuca ka marrë këtë nofkë për shkak të numrit të madh të njerëzve nga SHBA-ja që kanë blerë shtëpi atje vitet e fundit.
“Diçka e çuditshme ndodhi me këtë raund të tretë të ankandit për shtëpitë; menduam se më shumë amerikanë do të aplikonin, kështu që u habitëm kur për herë të parë ishin kryesisht italianë nga e gjithë Italia që bënë oferta,” thotë Cacioppo për CNN, transmeton Katror.info.
Sambuca ka nxjerrë në treg dhjetëra banesa ndër vite për të rigjallëruar komunitetin, i cili ka vuajtur nga shpopullimi pasi banorët janë zhvendosur në qytete më të mëdha.
Në dy edicionet e mëparshme, numri i kërkesave, kryesisht nga SHBA-ja, për të blerë shtëpitë e braktisura ishte aq i madh sa autoritetet vendore u detyruan të nxjerrin këto prona të vjetra në ankand.
Ndërsa disa ofertues zgjodhën të blejnë ndërtesa të rrënuara, më shumë se njëqind amerikanë blenë shtëpi të gatshme për banim nga vendasit, duke rigjallëruar tregun e pasurive të patundshme në zonë.
Rezultatet e raundit të fundit
Në nëntor, qyteti nxori në ankand një grup të ri shtëpish të rrënuara me çmim simbolik prej 3 eurosh, dhe Cacioppo priste që përsëri të përmbytej me qindra oferta nga blerës amerikanë. Por ai mbeti i habitur.
Vetëm 15 ofertues morën pjesë në ankand këtë herë dhe vetëm gjashtë prej tyre ishin të suksesshëm, duke ofruar nga 500 euro (rreth 513 dollarë) deri në 12,500 euro (12,837 dollarë).
Për herë të parë, shumica e ofertuesve fitues ishin italianë. Përveç një blerësi amerikan, të tjerët ishin nga vende të ndryshme evropiane, përfshirë tre italianë.
Cacioppo thekson se numri më i ulët i ofertuesve amerikanë nuk do të thotë se ata kanë ndalur interesin; përkundrazi, ata po blejnë shtëpi në tregun e zakonshëm të pasurive të patundshme, me çmime më të larta.
Skema e rigjallërimit
Paolo Morabito, 25 vjeç, një këshilltar financiar nga Mesina e Sicilisë, dhe miku i tij Bruno Surfaro, 28 vjeç, një arkitekt nga Kalabria, janë ndër italianët që blenë një pronë.
Ata ofruan shifrën e tyre me fat 2,222 euro për një ndërtesë të vogël prej 35 metrash katrorë me një tarracë panoramike.
Plani i tyre është të shpenzojnë rreth 30,000 euro për ta transformuar pronën në një shtëpi pushimi dhe një objekt për qira.
Rregullat e skemës kërkojnë që blerësit të përfundojnë punimet e restaurimit brenda tre viteve, përndryshe rrezikojnë të humbasin garancinë e tyre të depozitës.
‘Jemi zgjuar nga gjumi’
Cristian Salucci, 47 vjeç, nga Ravenna, pagoi 1,000 euro për një shtëpi prej 70 metrash katror dhe planifikon të investojë rreth 100,000 euro për ta rinovuar.
“Ne italianët kemi qenë të verbër ndaj vendeve si Sambuca, të mbushura me shtëpi të braktisura. E kemi këtë pasuri pikërisht para syve tanë,” thotë ai.
Një lidhje e veçantë me të kaluarën
Paul Kanitra, një zyrtar publik 45-vjeçar nga Nju Xhersi, ishte i vetmi blerës amerikan në këtë raund ankandi. Kanitra bleu një pronë të dëmtuar për t’u lidhur me rrënjët e tij italiane, pasi stërgjyshërit e tij u larguan nga Sambuca në fund të viteve 1800.
Pasi të përfundojë rinovimet, ai planifikon ta përdorë shtëpinë si një strehë pushimi dhe një qendër jo-fitimprurëse për të forcuar lidhjet mes Nju Xhersit dhe Sicilisë.
“Është mënyra jonë për t’u kthyer pas dhe për t’i dhënë diçka të dyja anëve të oqeanit,” thotë Kanitra./Katror.info
Përgatiti:
