Për miliona gra dhe vajza që mund të përballen me infeksione të traktit urinar (UTI) në vitet në vijim, tashmë do të kenë mundësi ta trajtojnë këtë gjendje me një medikament të ri, i pari i këtij lloji që miratohet pas gati tri dekadash.
Bëhet fjalë për një klasë të re antibiotikësh oralë, të dizajnuar posaçërisht për të trajtuar infeksionet e traktit urinar duke shmangur krijimin e rezistencës ndaj antibiotikëve ekzistues dhe duke parandaluar rikthimin e infeksioneve tek gratë që përballen shpesh me to.
Sipas CNN, ky ilaç i ri, me emrin gepotidacin, do të dalë në treg nën markën Blujepa dhe pritet të jetë i disponueshëm në gjysmën e dytë të vitit 2025. Blujepa është antibiotiku i parë oral për UTI që merr miratim në më shumë se 20 vjet, ndërsa kanë kaluar pothuajse 30 vite që kur është zhvilluar një trajtim i ri i këtij funksioni të rëndësishëm kundër baktereve, përcjell Katror.info.
Mundesh me e lexu edhe…
“Krenohemi që kemi zhvilluar Blujepa-n, antibiotikun e parë në një klasë të re për infeksionet e pakomplikuara të traktit urinar pas gati tri dekadash, duke ofruar një mundësi tjetër për pacientët që përballen me infeksione të përsëritura dhe me rritjen e rezistencës ndaj trajtimeve ekzistuese,” thuhet në deklaratën e kompanisë GSK, që ka zhvilluar këtë medikament.
Gepotidacin vepron duke sulmuar dy enzima që bakteret kanë nevojë për t’u shumuar. Rreth gjysma e grave do të përjetojnë një infeksion të traktit urinar gjatë jetës së tyre, ndërsa një e treta e tyre përballen me rikthime të shpeshta. Gratë preken nga këto infeksione shumë më shpesh sesa burrat. Vetëm në SHBA, infeksionet urinare shkaktojnë afërsisht 8 milionë vizita urgjente dhe 100,000 shtrime në spital çdo vit, sipas të dhënave të GSK.
Zhvillimi i këtij antibiotiku është mbështetur pjesërisht edhe nga fondet e Autoritetit Amerikan për Kërkime dhe Zhvillim të Avancuar Biomjekësor.
Në testimet klinike kanë marrë pjesë 3,000 gra dhe vajza, ku rezultatet treguan se Blujepa kishte efikasitet më të lartë krahasuar me nitrofurantoin, antibiotikun më i përshkruar aktualisht për UTI. Efektet anësore më të shpeshta të raportuara ishin diarreja dhe të përzierat, të cilat u shfaqën tek 16% dhe 9% e pjesëmarrëseve, kryesisht me intensitet të lehtë.
Ndërsa shumë persona zgjedhin të trajtojnë infeksionet urinare me metoda natyrale, ka raste kur infeksionet janë më agresive ose kur mundësitë alternative mungojnë – për shembull gjatë udhëtimeve – dhe në këto raste, një trajtim i sigurt dhe efektiv mbetet opsion i mirëpritur. /Katror.info
Përgatiti:
