Zbulimi i një helmete ushtarake është një nga gjetjet më emocionuese në arkeologji, pasi ato na japin një dritare të rrallë drejt historisë së luftës së lashtë dhe mesjetare. Së fundmi, në Danimarkë është zbuluar një helmetë e periudhës romake, e para e këtij lloji e gjetur ndonjëherë në këtë vend dhe vetëm e dyta në të gjithë Skandinavinë.
Helmetën e rrallë e zbuluan arkeologët në vendbanimin e epokës së hekurit në Løsning Søndermark, ku janë gjetur edhe dhjetëra armë, pjesë e një rituali të njohur si “sakrificë armësh.” Ky rit i veçantë, i dokumentuar në vende të ndryshme, besohet se kryhej pas betejave ose si pjesë e riteve mortore për figura të rëndësishme, shkruan Good News Network, transmeton Katror.info.
Në këtë gjetje të jashtëzakonshme u zbuluan gjithsej 119 maja heshtash dhe shtizash, 8 shpata, 5 thika, 3 maja shigjetash, një teh sëpate dhe një parzmore me rrjeta metalike—një objekt me vlerë të jashtëzakonshme në atë kohë, i cili kërkonte muaj të tërë për t’u ndërtuar. Përveç pajisjeve ushtarake, aty u gjetën edhe dy unaza besnikërie, një borí e lashtë, një frerë kali dhe qindra fragmente qeramike dhe stralli.
Mundesh me e lexu edhe…
Pjesë të panjohura prej hekuri dhe bronzi u identifikuan më vonë si komponentë të një helmete romake të tipit “Imperial Italic”, e cila i përket fazës së fundit të Perandorisë Romake, kur teknikat e ndërtimit të helmetave kishin arritur një nivel artistik dhe funksional të lartë.
Ekspertiza me rreze X tregoi se disa nga plakat metalike i përkisnin pjesëve mbrojtëse të faqeve dhe qafës, të cilat ishin pika të cenueshme për një ushtar romak në formacion betejash. Danimarka asnjëherë nuk ka qenë pjesë e Perandorisë Romake, prandaj mendohet se kjo helmetë është marrë si plaçkë lufte ose është shkëmbyer përmes tregtisë me fiset gjermane, të cilat kishin kontakte me popujt e Skandinavisë.
Armët u zbuluan në mbetjet e dy ndërtesave në Løsning Søndermark, në komunën Hedensted, dhe shumica e tyre ishin të përthyera në mënyrë dramatike, një praktikë e zakonshme në sakrificat rituale.
Në njërën ndërtesë, objektet u vendosën në gropat e lëna bosh pas heqjes së shtyllave mbajtëse të çatisë. Ndërsa në tjetrën, armët dhe pajisjet e tjera u ngjeshën rreth shtyllave mbajtëse gjatë ndërtimit të saj, përpara se të mbuloheshin me dhe. Kjo metodë e vendosjes i bindi arkeologët se këto ndërtesa nuk ishin as baraka ushtarake dhe as punishte armësh, por ishin përdorur për qëllime ceremoniale.
Në fillim të vitit 2025, një pjesë e këtyre objekteve të rralla pritet të ekspozohen në Muzeun Kulturor të Vejles në Danimarkë. /Katror.info
Përgatiti:
