Në vitin 2018, NASA arriti në asteroidin pranë Tokës, Bennu, për të mbledhur mostra të paprekura dhe për t’i analizuar ato në Tokë. Tani, shkencëtarët kanë zbuluar se kurrë më parë nuk janë identifikuar kaq shumë përbërës të jetës në një material jashtëtokësor.
Mostrat e Bennu përmbajnë të pesë bazat e ADN-së dhe ARN-së, si dhe një sasi të madhe aminoacidesh—aq sa krahasohen me një suplement multivitaminik. Misioni, i quajtur OSIRIS-REx, ishte i pari në histori që u ul në një asteroid dhe solli mostra nga sipërfaqja e tij në Tokë. Brenda tyre, u gjetën 14 nga 20 aminoacidet e njohura në jetën në Tokë, duke përfshirë të nëntë aminoacidet esenciale, të përziera në mënyra të veçanta me 19 aminoacide të tjera jo-proteinike, të rralla ose të panjohura në biologjinë tokësore, shkruan Good News Network, transmeton Katror.info.
“Sot e dimë që në Bennu, përbërësit bazë të jetës po kombinoheshin në mënyra komplekse dhe interesante,” tha Tim McCoy, kuratori i meteoriteve në Muzeun Smithsonian dhe bashkautor i studimit të ri. “Kemi zbuluar një hap tjetër në rrugën drejt jetës.”
Mundesh me e lexu edhe…
Asteroidi nga i cili Bennu është shkëputur u formua rreth 4.5 miliardë vjet më parë dhe duket se ka pasur xhepa me ujë të lëngshëm. Po ashtu, ai përmban përbërës të pasur me azot dhe amoniak, dhe zbulimet e fundit sugjerojnë se uji është avulluar, duke lënë pas një krustë të kripur, të ngjashme me shtresat e thata të liqeneve në Tokë.
Teoria e origjinës së jetës pa ndërhyrjen e një krijuesi njihet si sinteza organike prebiotike. Shkencëtarët besojnë se kjo mund të ketë ndodhur në ujë të lëngshëm, në kushte ku këto elemente mund të bashkëvepronin.
Një nga gjetjet më befasuese është prania e karbonatit të natriumit, i cili nuk ishte zbuluar më parë në meteorite dhe asteroide. Në Tokë, karbonatet e natriumit gjenden shpesh në liqene të thata dhe mund të krahasohen me sodën e bukës.
Brinat e Bennu ndryshojnë nga ato tokësore për shkak të përbërjes së tyre minerale. Për shembull, mostrat përmbajnë fosfor të bollshëm, një element i zakonshëm në meteorite, por i rrallë në Tokë. Nga ana tjetër, ato pothuajse nuk përmbajnë bor, një element i zakonshëm në liqenet hipersaline në Tokë, por tepër i rrallë në meteorite.
Studiuesit sugjerojnë se brina të ngjashme mund të ekzistojnë ende në trupa të tjerë jashtëtokësorë, si planeti xhuxh Ceres dhe sateliti i akullt i Saturnit, Enceladus, ku sondat hapësinore kanë zbuluar karbonat natriumi.
Megjithëse mostrat e Bennu përmbajnë një përzierje intriguese mineralesh dhe elementësh, mbetet ende e paqartë nëse mjedisi i tij ishte i përshtatshëm për të formuar struktura organike më komplekse.
“Dimë që kemi përbërësit bazë për të ndjekur këtë rrugë drejt jetës, por ende nuk e dimë sa larg mund të ketë shkuar ky proces në atë mjedis,” tha McCoy. /Katror.info
Përgatiti:
