Kosova vazhdon të përballet me kërkesën e partnerëve të saj për të çuar draft-statutin e Asociacionit të Komunave me shumicë serbe në Gjykatën Kushtetuese që nënkupton se edhe tentativa e radhës e Kosovës për anëtarësim në Këshillin e Europës do të sfidohet me kushtin e njëjtë. Një e tillë iu bë dje Kosovës nga Mbretëria e Bashkuar, e cila u kujdes të tregonte se kjo kërkesë është e ‘të tjerëve’, por se e nxisin Kosovën për ta përmbushur për të qenë e suksesshme në KiE.
Vizita e Sekretarit të Jashtëm britanik në Kosovë, David Lammy, solli edhe njëherë mbështetjen që qeveria britanike i jep Kosovës.
Lammy në Prishtinë reflektoi qëllimet e bashkëpartiakut të tij, Tony Blair, për një Kosovë që është në gjendje të formësojë të ardhmen e saj, të bashkëjetojë në mënyrë paqësore me fqinjët e saj dhe të mbrojë diversitetin e qytetarëve të saj.
Mundesh me e lexu edhe…
“Sekretari i Jashtëm shpreson se qeveria e ardhshme e Kosovës do t’i adresojë të gjitha nevojat e qytetarëve, duke përfshirë përparimin në integrimin e serbëve të Kosovës dhe angazhimin fuqishëm në dialogun e lehtësuar nga BE-ja. Mbretëria e Bashkuar do të punojë së bashku me BE-në për të siguruar që ne të kemi përparim që funksionon për popullin e Kosovës dhe Serbisë”, tha ambasadori britanik në Kosovë, Jonathan Hargreaves, pas përfundimit të vizitës së kryediplomatit të vendit të tij.
Kosova humbi shansin vitin e kaluar për t’u anëtarësuar në organizatën më të rëndësishme të kontinentit për të drejtat e njeriut për shkak të kushtit që iu vu nga partnerët e saj në Këshill të Europës për të çuar draft-statutin e BE-së për Asociacionin e Komunave me shumicë serbe për t’u testuar në Gjykatën Kushtetuese.
Qeveria e Kosovës ishte ankuar në partnerët e saj për kushtëzimin si të padrejtë ndaj saj, megjithatë procesi u bllokua.
Për këtë ambasadori britanik u kujdes të tregojë se ky kusht është i “të tjerëve” dhe jo britanikëve, por tha se shpreson që Kosova ta plotësojë atë.
“Mbretëria e Bashkuar pa mëdyshje mbështet anëtarësimin e Kosovës në Këshillin e Europës dhe shpreson se ajo mund të përmbushë shpejt kërkesat e të tjerëve”, tha Hargreaves, duke përçuar mesazhet e Lammyt.
Për draft-statutin që i kërkohet Kosovës ta dërgojë në Kushtetuese kishte folur së fundi presidentja Vjosa Osmani, e cila tha se sipas mendimit të saj, ky draft-statut s’do të kalonte testin e gjykatës.
“Po flasim për çështjen e draft-statutit të BE-së që unë personalisht besoj që nuk janë në përputhje me Kushtetutën e Kosovës, nuk janë në përputhje as me vlerat dhe normat e BE-së dhe standardet e Këshillit të Europës pastaj dhe po ashtu nuk janë në përputhje me vendimin e Gjykatës Kushtetuese të 2015-ës. Një draft-statut i tillë që bie ndesh me këto të tria s’ka si të hyjë në fuqi dhe as nuk besoj që do të mund të kalonte çfarëdo testi në Gjykatën Kushtetuese, e cila që tashmë ka vendosur standarde për shumë nga këto tema të vendosura brenda draft-statutit siç janë kompetencat ekzekutive të Asociacionit e shumë çështje të tjera”, kishte thënë Osmani. /Katror.info
Përgatiti:
