Kjo javë ka qenë e mbushur me lajme të mira – nga arritje në shkencë e inovacion, te momente frymëzuese në kulturë e komunitet. Si çdo javë, edhe këtë herë kemi përzgjedhur 5 lajme që do t’ju ngrenë humorin dhe do t’jua zbukurojnë fundjavën. A jeni gati për një dozë të mirë energjie pozitive?
Hajde të zbulojmë bashkë lajmet e mira të javës!
Po e nisim me një super lajm të mirë!
Mundesh me e lexu edhe…
Prishtina ka qenë nikoqire e energjisë më të mirë këtë javë: edicioni i tretë i PowerToHR ka mbledhë në një vend gjigantët e teknologjisë, marketingut dhe HR-it nga mbarë bota. Folës nga Google, META, Adidas, Booking e Wolt diskutuan për të ardhmen e punës, ndikimin e AI-së dhe pse njerëzit të lumtur janë çelësi i çdo suksesi.
Në PR Zone, një prej zonave më të veçanta të samitit, 18 folës ndanë njohuritë e tyre – përfshirë edhe drejtorin ekzekutiv nga Katror Media, Muhamet Jashanica i cili ndau përvojën e mediumit të parë në gjuhën shqipe për lajme të mira dhe gazetari konstruktive, që tash e tri vjet po e promovon gazetarinë konstruktive me lajme të mira (si kjo që po lexon tani:)), e që kësaj here ishte edhe media partner i samitit global Power to HR.
Folësit s’u kursyen as për të theksuar rëndësinë e kreativitetit njerëzor, rrjetizimit dhe edukimit të bizneseve për një të ardhme më të zgjuar.
Nëse nuk ke qenë pjesë e këtij samiti, kap pak nga atmosfera dhe inspirimi këtu:
Nga ideja në laborator, e deri në panairin më të madh evropian – kur një shqiptar sjell inovacion në industrinë globale!
Në kutinë tonë të lajmeve të mira këtë javë ra një dritë e ndritshme nga Prizreni — dhe jo rastësisht. Sepse kur njerëzit tanë punojnë me përkushtim dhe përqafim të inovacionit, rezultatet nuk kanë si të mos shpërfaqen në skenën ndërkombëtare.
Në panairin prestigjioz European Coatings Show 2025 në Nuremberg, industria kimike globale u njoh me një produkt revolucionar që synon të transformojë mënyrën se si ndërtojmë dhe mbrojmë strukturat tona:
Baxxodur EC 151 – një ngurtësues i ri për rrëshirat epokside që ul ndjeshëm emetimet e dëmshme, është më i lehtë për t’u aplikuar dhe ka qëndrueshmëri të lartë.
Në zemër të këtij zhvillimi qëndron Edis Kasëmi, shkencëtari nga Prizreni, i cili ka udhëhequr projektin si pjesë e Sika Technology AG, në Cyrih. Me përdorimin e teknikave të avancuara të dizajnit molekular dhe sintezës kimike, ai dhe ekipi i tij krijuan një formulë që tashmë është e mbrojtur nga mbi 30 patenta.
Ky nuk është vetëm një sukses profesional – është dëshmi se edhe nga Kosova mund të kontribuojmë në riformësimin e industrive globale dhe të shkëlqejmë në botën shkencore.
Ky është lajmi që na kujton: Inovacioni nuk ka kufij. Ka vetëm njerëz që guxojnë!
Artikulli i plotë këtu.
Kur politika e gjelbër takon ndërgjegjësimin qytetar, lind shpresa për një të ardhme më të pastër!
Në një kohë kur mbrojtja e natyrës është më urgjente se kurrë, Kosova ka bërë një hap të guximshëm drejt zvogëlimit të një prej ndotësve më të përhapur në përditshmërinë tonë – qeset plastike.
Në kuadër të iniciativës “Thuaj JO qeseve plastike!”, mbështetur nga GIZ Kosova, vendi ynë ka nisur një hap të rëndësishëm drejt një të ardhmeje më të pastër. Përdorimi i qeseve plastike, të cilat shpesh qëndrojnë në natyrë deri në 300 vjet, ka shkaktuar ndotje të madhe në rrugë, lumenj dhe peizazhe natyrore. Kosova është ndër vendet me përdorimin më të lartë të qeseve plastike në Evropë, me një konsum prej 335 qeseve për person në vit.
Nëpërmjet një kornize të re ligjore, që përfshin masa të qarta për ndalimin e qeseve plastike të dëmshme dhe inkurajimin e përdorimit të alternativave të biodegradueshme, Kosova synon të reduktojë ndjeshëm përdorimin e këtyre qeseve. Objektivi është të arrihet një përdorim prej 40 qese plastike deri në vitin 2030.
Ky hap është një investim për një të ardhme më të gjelbër dhe një shembull i bashkëpunimit të suksesshëm mes institucioneve dhe partnerëve ndërkombëtarë. Fushata kërkon ndërgjegjësimin e qytetarëve për të shmangur përdorimin e qeseve plastike dhe për të zgjedhur alternativa më të qëndrueshme.
Çdo veprim i vogël kontribuon për një Kosovë më të pastër!
Një lajm i rëndësishëm për natyrën: Kastori Euro-Aziatik kthehet në Kosovë pas gati 200 vitesh!
Një ngjarje e mrekullueshme ka ndodhur në natyrën e Kosovës: kastori euro-aziatik, pas gati dy shekujsh, është rikthyer në habitatin e tij natyral!
Ky rikthim është një lajm i jashtëzakonshëm që tregon forcën dhe qëndrueshmërinë e natyrës, dhe është një hap i madh për biodiversitetin në Kosovë.
Kastori është një specie kyçe për ekosistemin dhe rikthimi i tij do të ketë ndikim të madh për përmirësimin e cilësisë së ujit dhe ruajtjen e ekuilibrit natyror. Me ndihmën e digave që ata krijojnë, kastorët mundësojnë filtrimin e ujit dhe ndihmojnë në parandalimin e gërryerjes së tokës, duke mbajtur natyrën të shëndetshme dhe të qëndrueshme.
Fondacioni për të Drejtat e Kafshëve po punon për të siguruar që kastori të jetë i mbrojtur dhe të mund të kontribuoni në ekosistemin tonë pa rrezik. Ky rikthim është një tjetër shembull i rëndësishëm për angazhimin tonë për të ruajtur biodiversitetin dhe për të siguruar një të ardhme më të gjelbër dhe më të qëndrueshme për të gjithë! Aritkulli i plotë këtu.
Një mundësi e shkëlqyer për kulturën shqiptare: Ansambli ‘Gjilani’ do të prezantojë traditën shqiptare në Sllovaki!
Kur kultura, muzika dhe tradita shqiptare shpërfaqen në skenën ndërkombëtare, na mbushin me gëzim dhe ndjenjë krenarie. Ansambli folklorik “Gjilani” do të sjellë kulturën e pasur shqiptare në Sllovaki, duke marrë pjesë në një festival kulturor ndërkombëtar nga 11 deri më 15 shtator. Ky është një moment i veçantë që na lidh më fort me rrënjët tona dhe na mundëson të ndajmë me botën një pjesë të pasurisë dhe identitetit tonë kombëtar përmes muzikës dhe valleve folklorike.
Kjo pjesëmarrje është një mundësi e shkëlqyer për promovimin e trashëgimisë kulturore shqiptare, duke u bërë një pasqyrë e përkushtimit të pandërprerë të Ansamblit “Gjilani” për ruajtjen dhe prezantimin e folklorit. Me mbështetje nga CIOFF Kosova dhe z. Arsim Abazi, ansambli do të shërbejë si një urë lidhëse mes kulturave, duke promovuar dialogun dhe bashkëpunimin përmes artit dhe traditës. Artikulli i plotë këtu.
Dhe për ta mbyllur këtë edicion me një mesazh, kujtojmë se çdo hap që hedhim për të ruajtur dhe promovuar kulturën tonë është një kontribuim drejt ndriçimit të pasurisë që kemi, duke e bërë Kosovën një vend më të pasur me vlera dhe më të bukur për të gjithë.
Po ashtu, lajmet e mira të kësaj jave na kujtojnë se me përkushtim dhe pasion, mund të krijojmë mundësi për një të ardhme më të mirë për të gjithë. Çdo arritje, pavarësisht sa e vogël mund të duket, është një hap drejt përparimit dhe ndryshimit pozitiv. Le të jemi të frymëzuar nga këto ngjarje dhe të vazhdojmë të besojmë se gjithçka është e mundur kur punojmë së bashku për të ndihmuar njëri-tjetrin dhe për të kontribuar në komunitetin tonë! /Katror.info
Përgatiti:
