Nga data 26 maj deri më 6 qershor 2025, Kosova do të mirëpresë ushtarë nga 19 vende të botës në kuadër të ushtrimit ushtarak ndërkombëtar “Defender Europe 25”, i cili udhëhiqet nga Shtetet e Bashkuara të Amerikës.
Sipas kryeministrit në dorëheqje të Kosovës, Albin Kurti, këtë vit Kosova do të jetë njëra nga 18 vendet nikoqire të këtij ushtrimi, ku do të marrin pjesë rreth 25 mijë ushtarë nga 29 vende aleate dhe partnere. Vetëm në territorin e Kosovës pritet të angazhohen rreth 12 mijë ushtarë nga 19 shtete pjesëmarrëse.
”Edhe kësaj radhe, Kosova do të jetë ndër 18 vendet nikoqire të ushtrimit më të madh ushtarak që drejtohet nga Shtetet e Bashkuara të Amerikës, e ku marrin pjesë 25 mijë ushtarakë nga 29 vende aleate e partnere. Nga 26 maji e deri më 6 qershor, do t’i mirëpresim rreth 12 mijë ushtarakë nga 19 vende për ushtrimin e reagimit të menjëhershëm, një nga tre ushtrimet që do të zhvillohen në kuadër të Defender Europe 25”, thuhet në njoftim.
Mundesh me e lexu edhe…
Sipas njoftimit, një nga risitë e këtij edicioni është vendosja e Komandës së Divizionit të 28-të të Këmbësorisë së ushtrisë amerikane në Aeroportin e Gjakovës. Nga kjo komandë do të udhëhiqen të gjitha ushtrimet që do të zhvillohen në rajonin e Ballkanit.
Kosova është përfshirë në ushtrimet “Defender Europe” që nga viti 2021, si pjesë e bashkëpunimit me shtetet anëtare të NATO-s dhe Shtetet e Bashkuara të Amerikës në fushën e mbrojtjes dhe sigurisë. /Katror.info
Përgatiti:
