Distria Krasniqi është kualifikuar në finalen e Kampionatit Evropian të xhudos, që po zhvillohet në Podgoricë, shkruan Katror.info.
Në finale, ajo do të përballet me italianen e njohur, Odette Giuffrida, në kategorinë deri në 52 kilogramë.
Si bartëse e parë, Distria siguroi me lehtësi vendin në finale, pasi fitoi tri ndeshje radhazi: fillimisht kundër serbes Milica Nikoliq, më pas ndaj Naomi Van Krevel nga Holanda dhe në gjysmëfinale mposhti spanjollen Ariane Toro Soler.
Mundesh me e lexu edhe…
Giuffrida, e konsideruar një prej emrave më të mëdhenj në këtë kategori, ishte së fundmi pjesë e një kampi stërvitor në Pejë – megjithatë, nuk është përballur asnjëherë me Distrinë gjatë stërvitjeve.
Kjo përballje e radhës do të jetë e 12-ta mes tyre. Krasniqi ka dalë fituese në shtatë prej tyre, ndërsa Giuffrida në katër. Megjithëse italianja e fitoi tri ndeshjet e para mes tyre, Distria e ka përmbysur bilancin në favor të saj në vitet e fundit, me një seri prej tri fitoreve aktualisht.
Për më tepër, ajo ka triumfuar ndaj Giuffridës edhe në finalen e Kampionatit Evropian të kaluar, si dhe në gjysmëfinalen e Lojërave Olimpike në Paris dhe atë të Evropianit 2023.
Një përballje e fortë pritet sërish mes dy emrave të mëdhenj të xhudos evropiane./Katror.info
