Dy shtetase të huaja që ishin zhdukur në bjeshkët e Sharrit u gjetën të sigurta në orët e hershme të mëngjesit të së enjtes, pas një operacioni të gjatë dhe intensiv kërkimi nga autoritetet kosovare, shkruan Katror.info.
Sipas njoftimit të Policisë së Kosovës, të dy gratë ishin akomoduar në një hotel në Brezovicë dhe të mërkurën në mëngjes ishin nisur për një ecje malore në bjeshkët e Sharrit. Gjatë rrugës, për shkak të kushteve të vështira atmosferike dhe terrenit të panjohur, ato kishin humbur rrugën.
“Rreth orës 20:50, Policia Rajonale e Ferizajit, përkatësisht Stacioni Policor në Shtërpcë, ka pranuar një informatë se dy alpinistet kishin humbur dhe ndodheshin në zonën malore të Sharrit, por pa ditur saktësisht vendndodhjen e tyre. Përmes një audio incizimi, ato kishin treguar gjendjen e tyre të rënduar dhe pamundësinë për të vazhduar më tej,” thuhet në njoftimin zyrtar.
Mundesh me e lexu edhe…
Menjëherë pas pranimit të informatës, Policia e Kosovës ka kërkuar ndihmën e Forcës së Sigurisë së Kosovës (FSK) dhe Shërbimit të Kërkim Shpëtimit Malor të Kosovës, duke filluar operacionin e kërkimit në terren.
Pas disa orësh kërkimesh të koordinuara, më 22 maj rreth orës 03:00 të mëngjesit, dy gratë u gjetën në bjeshkët e fshatit Gotovushë. Ato u transportuan menjëherë me autoambulancë në Shtëpinë e Shëndetit në Shtërpcë. Sipas mjekëve, gjendja e tyre është stabile, ndërsa njëra prej tyre ka pësuar një lëndim të lehtë në këmbë.
Policia ka falënderuar të gjitha institucionet që morën pjesë në operacionin e shpëtimit, duke theksuar rëndësinë e bashkëpunimit institucional për garantimin e sigurisë në zonat malore./Katror.info
