Festivali i animacionit Anibar këtë vit po ofron jo vetëm filma, por edhe diskutime të thella me profesionistë të industrisë. Përmes një sërë panelesh, pjesëmarrësit do të kenë mundësinë të dëgjojnë dhe të mësojnë nga zëra të njohur të animacionit ndërkombëtar dhe rajonal, shkruan Katror.info.
Tre panele kryesore do të trajtojnë tema të ndryshme. “Ask the Pro”, i moderuar nga Aneta Ozorek, sjell bashkë në një panel emra si Corinne Destombes, Britt Raes, Olivier Catherin, Aaron Wood dhe Lucia Dubravay, duke ofruar këshilla dhe përvoja të drejtpërdrejta për profesionistët në zhvillim.
Paneli “Ethical Storytelling”, i udhëhequr nga Lum Çitaku, do të hapë diskutim për rolin dhe përgjegjësinë etike të tregimtarëve në industrinë e animacionit, me pjesëmarrjen e Natasza Cetner, Luc Camilli dhe Trëndelina Halili.
Mundesh me e lexu edhe…
Ndërkaq, “Animation Careers in the Balkans”, me moderatore Vessela Dantcheva, fokusohet te sfidat dhe mundësitë e të rinjve në këtë fushë në rajon. Panelistët përfshijnë emra si Marko Dješka, Draško Ivezić, Flaka Kokolli dhe Krste Gospodinovski.
Të gjithë të interesuarit mund të gjejnë më shumë informacione për temat, pjesëmarrësit dhe oraret në seksionin “Panele dhe diskutime” në webfaqen zyrtare të Anibar./Katror.info
