Eksporti i domates nga Kosova ka shënuar një rritje të jashtëzakonshme, duke u rritur nga vetëm 72 mijë euro në vitin 2021, në 11 milionë euro në vitin 2024. Kjo përfaqëson një përmirësim drastik që dëshmon për potencialin gjithnjë në rritje të bujqësisë vendore në tregjet ndërkombëtare.
Sipas ministrit në detyrë të Bujqësisë, gjatë një vizite në Pejë, kjo rritje është pjesë e një tendence më të gjerë pozitive në sektorin e perimeve. Në periudhën 2021–2024, eksporti i përgjithshëm i perimeve është rritur me 66.9%, duke arritur në 41 milionë euro, nga 24.7 milionë euro sa ishte në periudhën 2017–2020.
Ministri e cilësoi këtë sukses si rezultat të përkrahjes së vazhdueshme për fermerët, investimeve në infrastrukturë, përdorimit të serave moderne dhe një qasjeje të re strategjike ndaj tregjeve të jashtme.
Mundesh me e lexu edhe…
“Kjo është dëshmi e qartë që investimet dhe përkushtimi në bujqësinë vendore po japin rezultate konkrete dhe po kontribuojnë në fuqizimin ekonomik të vendit,” theksoi ai.
Ndërkaq sipas Analizës së Tregut për Sektorin e Perimeve për vitin 2021, të dhënat tregojnë se sasia e domateve të freskëta të eksportuara ra me 33% krahasuar me vitin paraprak, vlera për njësi u rrit për 30.7%. Po ashtu, gjatë atij viti filloi eksporti i domates së përpunuar (jo e freskët), me një çmim mesatar prej 0.85 euro për kilogram./Katror.info.
