Më 5 dhjetor, nga ora 18:30 në Open Art Gallery hapet ekspozita personale e artistit Artan Balaj, kuruar nga Arta Agani.
Për artistin:
Artan Balaj është artist i cili I takon gjeneratës që doli në skenë pas luftës, gjeneratë e cila i nisi shumë gjëra të reja në artin Kosovar, falë guximit të tyre për eksperimentim dhe për mendjen e hapur ndaj mediave të reja dhe formateve inovative ne art, shkruan Gazeta Express.
Mundesh me e lexu edhe…
Balaj ka insistuar qysh atëhere në origjinalitetin e kreacioneve të veta të cilat ndeshin pikturën, vizatimin dhe fotografinë me inovacionin teknologjik. Karrierën e ka filluar me piktura monumentale ekspresive. Duke i mbajtur gjithmonë pikturat si linjë bazë të krijimtarisë, ka vazhduar me ngulm të hulumtojë në media tjera, hulumtim ky që filloi te fotografia e cila ishte përkohësisht preokupim i tij, ku ai gjen mënyrën e shprehjes përmes fotografisë minimale dhe abstrakte. Pas zhvendosjes në Antwerpen të Begjikës, ku ai filloi një jetë të re, krijimtarinë e vazhdoi me teknika të reja të cilat oscilojnë për nga stili mes një lloj pointilizmi abstrakt dhe teksturave futuristike me elemente astrofizike dhe të fantashkencës.
Detaji dhe rregullsia e vijës brenda një totali të çrregullt, do të ishte fjalia përkufizuese e stilit të fundit të veprës së Balajt. Rregullsia mbase ndikohet prej hulumtimeve që ai zhvilloi mbi artin e tatuazheve në Kosovë dhe Belgjikë. Ishte mu aty ku buroi interesimi I tij për zhvillimin e simboleve abstrakte që shfaqen në ekspozitën e rradhës të cilën e sjell në vendlindje.
Koncepti:
Atlasi i specieve antropomorfe
Arta Agani- kuratore
Ekspozita ANTROPOMORPH shfaq rreth 80 vizatime digjitale, një instalacion dhe piktura.
Të gjitha veprat janë rezultat I hulumtimit që filloi me skicat për tattoo, të cilat paraqisnin disa forma bazë e prej të cilave u zhvilluan kompozicionet tjera.
Nëse i shikojmë këto forma me kujdes do të zbulojmë se ato janë vërtet antropomorfe në kuptimin e qenieve shumëqelizore, indeve dhe nyjeve që i bashkojnë ato pjesë të vendosura në pozita të cuditshme. Por ka diçka aliene dhe jo njerëzore apo morbide brenda tyre dhe në mënyrën se si komunikojnë me ne. Sado që duam të shohim dicka të njohur për perceptimin tonë, do të dështojmë. Ato gjallojnë në formë të huaj për ne, formë e cila sado që është organike ka karakter “cyborg” ose hibridi antropomorf nga një planet imagjinar i largët. Balaj na tregon një botë tjetër, mbase një univers paralel dhe specie tjera të cilat i zbuloi brenda artit të tij. Ajo që shohim në ekspozitën ANTROPOMORF është një studim i detajuar iterativ i cili kronologjikisht paraqet matriksat dhe kopjet, klonet e shumëfishuara të cilat transformohen duke u bashkuar në struktura të reja më komplekse. Derisa vizatimet paralajmërojnë, instalacioni përfaqëson vetë transformimin. Ndërkaq, pikturat në një formë e paraqesin të ardhmen e universit, tani më të përfshirë nga antropomorfet.
Përtej një vizatimi digjital mjeshtëror që del nga shpirti i artistit piktural- ekspresiv, Balaj me këto vepra observon transformimin e njerëzimit duke reflektuar mbi ndikimin e teknologjisë në njerëzimin, me krijimin e këtyre formacioneve joshëse dhe estetike por njëkohësisht agresore. Si edhe çdo artist që me secilen vepër e ekspozon një pjesë të botës së brendshme të tij, edhe Balaj na bën të konsiderojmë dhe vetë atë si një entitet të huaj në vendin ku jeton, i cili na përshkruan metamorfozën e tij prej artisti dhe qenieje njerëzore për t’iu përshtatur kushteve përherë të ndryshueshme jetësore.
Biografia Artan Balaj
Artan Balaj – Artist vizual. I lindur me 1977 në Prishtinë / Kosovë. Ka përfunduar nivelin Bachelor dhe Master në Fakultetin e Arteve – dega e pikturës në Universitetin e Prishtinës. Po ashtu ka përfunduar kurse të fotografisë dhe për menaxhim të kulturës. Ka qenë autor, drejtor dhe projekt menaxher i disa projekteve. Momentalisht punon edhe si trajner i stafit në Parlamentarium – Qendra e Vizitorëve të Parlamentit të Evropës në Bruksel / Belgjikë. Paraprakisht ka punuar si: Projekt Menaxher dhe Drejtor Artistik në kompaninë e marketingut “The Group” në Prishtinë / Kosovë, asistent i lëndës së Anatomisë Plastike në Universitetin AAB në Prishtinë. Fitues i programit JFDP nga American Councils në Arizona State University, Arizona dhe University of Kansas, Kansas në SHBA. Dymbëdhjetë ekspozita personale: 2022 “Loop” Antwerp/Belgjikë 2018 “Staring at Abyss” Gostivar/Maqedoni; 2017 “Tu pi Kafe”Prishtinë/Kosovë; 2014 “Hiding in Plain Sight” Utrecht/Holand; 2012 “Reflections” Bruksel/Belgjikë; 2010 “The Young Europeans” Belforte del Chienti/Itali; 2009 “Alien” Tecate/Meksikë; 2007 “Urban Culture and Subcultures II” Aiud/Rumani; 2007 “Urban Culture and Subcultures I” Nowy Targ/Poloni; 2007 “The Others” Prishtinë/Kosovë; 2005 “N.V.” Rahovec/Kosovë; 2005 “Kosova Nuda Veritas” Prishtinë/Kosovë Pjesëmarrës në më shumë se 60 ekspozita kombëtare dhe ndërkombëtare në Kosovë, Shqipëri, Belgjikë, Francë, Austri, SHBA, Meksikë, Slloveni, Poloni, Maqedoni, Turqi, Sërbi, dhe Rumani.
Shpërblimet: 2009 “Branding Kosovo” *Best Opera Prima, – Potenza/ Itali; 2006 “Salloni i Nëntorit XXXI” *Çmimi për pikturë – Prishtinë/Kosovë; 2005 “Bienalja Ndërkombëtare e Arteve Bashkëkohore” * Special Prize for Young Artist – Arad/Rumani
Biografia Arta Agani
Arta Agani (1973) jeton dhe punon në Prishtinë. Nga gushti i vitit 2016 deri në gusht të vitit 2020, ajo punoi si drejtoreshë e Galerisë Kombëtare të Kosovës. Ajo është gjithashtu udhëheqëse e programit të Dizajnit të Komunikimit në Akademinë Evolution dhe që nga viti 2007 ka qenë profesoreshë e kurseve të ndryshme në këtë fushë.
Arta ka një diplomë master në Dizajn Grafik nga Universiteti i Prishtinës dhe një certifikatë në Dizajn Ekspozitash nga Departamenti i Shkencave të Imazhit në Universitetin Danub Krems në Austri.
Karriera e saj profesionale përfshin dizajnin si profesionin kryesor, krahas projekteve artistike dhe ekspozitave, me fokus në menaxhimin e projekteve artistike dhe kurimin e ekspozitave. Angazhimet e saj të spikatura përfshijnë rolin e kuratores për Pavijonin e Kosovës në Bienalen e 57-të të Venecias në vitin 2017, ku u prezantua artisti Sislej Xhafa, si dhe rolin e komisioneres për Pavijonin e Kosovës në Bienalen e 58-të të Venecias në vitin 2019, në bashkëpunim me kuratorin Vincent Honoré dhe artistin Alban Muja.
Në vitin 2019, ajo kuroi ekspozitën “Perceptions: Burrneshat” në Galerinë Kombëtare në vitin 2018, në bashkëpunim me British Council. Poashtu ajo ishte pjesë e ekipit kuratorial për një ekspozitë të madhe grupore në Piran, Slloveni, të titulluar “SELFIE(sh) ME.” Në vitin 2021, ajo kuroi projektin e ndërhyrjes publike “Drita Depërton Kudo” me Filoart nga Berlini. Në vitin 2020, ajo kuroi ekspozitën “Akt i Mbrëmjes” për Artpolis gjatë festivalit FemArt.
Arta është themeluese dhe drejtoreshë e Institutit ROMB për Kërkime Artistike dhe Kulturore, dhe aktualisht bashkëpunon me Globalodromia Filoart nga Berlini si kuratore duke kuruar dy instalacione publike “HOW LONG IS NOW” në Prishtinë dhe “WHERE IS I” në PRizren.
Gjatë vitit të kaluar, ajo ka qenë gjithashtu pjesë e grupit të ekspertëve të Komunës së Prishtinës, duke punuar në rregulloren e re të kulturës. Në vitin 2024, ajo kuroi disa ekspozita, përfshirë “I NOW” me lëvizjen Filoart dhe “A ishe një ëndërr?” në bashkëpunim me festivalin RLIOF. /Katror.info
Përgatiti:
