Federata e Basketbollit e Kosovës (FBK) do të organizojë më 18 qershor forumin “Safeguarding the Future – Lansimi i politikave të mbrojtjes në basketboll”, një ngjarje që synon të shënojë një kthesë të rëndësishme në krijimin e një mjedisi të sigurt dhe gjithëpërfshirës për të gjithë pjesëmarrësit në basketbollin vendor, shkruan Katror.info
Forumi do të mbahet në Bibliotekën Kombëtare të Kosovës, nga ora 09:00 deri në 13:30, dhe do të shërbejë si platformë për prezantimin zyrtar të politikave të mbrojtjes të hartuara nga FBK në kuadër të projektit ndërkombëtar “Safeguarding the Future”. Këto politika do të hyjnë në fuqi që nga sezoni i ardhshëm i garave dhe do të aplikohen në të gjitha nivelet dhe kategoritë e basketbollit në Kosovë.
Në hapje të forumit do të flasin Kryetari i FBK-së, Arben Fetahu, dhe Presidenti i Komitetit Olimpik të Kosovës, Ismet Krasniqi, të cilët do të theksojnë rëndësinë e zhvillimit të një kulture të sigurisë, përgjegjësisë dhe respektit në sport.
Mundesh me e lexu edhe…
Ngjarja do të sjellë diskutime të rëndësishme në dy panele të ndara. Paneli i parë do të fokusohet në rolin e institucioneve në zbatimin e politikave të mbrojtjes, me pjesëmarrjen e përfaqësuesve të FBK-së, Agjencisë së Sportit, Zyrës Erasmus+ në Kosovë dhe profesionistëve të përfshirë në hartimin dhe zbatimin e këtyre politikave. Ndërsa paneli i dytë do të japë zërin e komunitetit të basketbollit, përmes përvojave personale të një trajneri, një lojtareje dhe një prindi, të cilët do të ndajnë perspektivat e tyre mbi sigurinë dhe mbrojtjen në sport.
Forumi është rezultat i një pune 30 mujore të FBK-së në partneritet me Federatat e Basketbollit të Estonisë dhe Bullgarisë, si dhe Shoqatën e Trajnerëve të Basketbollit të Kosovës (SHTBK), në kuadër të projektit Erasmus+ “Safeguarding the Future”. Si pjesë e këtij projekti, është zhvilluar një paketë e plotë prej 13 dokumentesh të politikave mbrojtëse, të cilat janë harmonizuar me legjislacionin e Kosovës dhe me standardet ndërkombëtare të FIBA-s./Katror.info
