Një familje ka bërë një përparim që mund të sjellë shpresë për mijëra prindër, të cilëve u është thënë se fëmijët e tyre nuk do të flasin kurrë.
Kur djali i tyre, Mason, tani 5 vjeç, u diagnostikua me autizëm joverbal në moshën 2 vjeç e gjysmë, familja Connor vendosi të kërkonte çdo mundësi për ta ndihmuar atë të fliste, shkruan New York Post, transmeton Katror.info.
Pas disa trajtimeve të pasuksesshme, i ati i Masonit, Joe, gjeti një studim të Dr. Richard Frye, një neurolog pediatrik që po hulumtonte trajtime eksperimentale për fëmijët me autizëm.
Mundesh me e lexu edhe…
Frye propozoi përdorimin e leukovorinës, një ilaç gjenerik dhe i lirë, që shpesh u përshkruhet pacientëve me kancer për të zbutur efektet e kimioterapisë. Vetëm tri ditë pas marrjes së ilaçit, Mason tha fjalët e tij të para.
Leukovorina përbëhet nga acidi folik, i njohur edhe si vitamina B9, e cila gjendet në formën e folatit në ushqime si perimet me gjethe jeshile, lakrat e Brukselit dhe avokadoja. Disa studime kanë treguar se shumë fëmijë me autizëm kanë nivele të ulëta të folatit në tru, një gjendje e njohur si mungesa cerebrale e folatit (CFD).
Kërkime të tjera sugjerojnë se një numër i madh fëmijësh me autizëm kanë antitrupa që mund të pengojnë transportin e folatit në tru. Kjo mund të shpjegojë pse ky ilaç mund të ndihmojë fëmijët me autizëm në vështirësitë e tyre të komunikimit.
“Kjo mund të ketë një ndikim të konsiderueshëm te një përqindje mjaft e madhe e fëmijëve me autizëm,” tha Frye.
“Ne kemi bërë kërkimet shkencore dhe hapi tjetër është sigurimi i më shumë financimeve, në mënyrë që ta miratojmë nga FDA,” shtoi ai.
Ky hulumtim përfshin edhe studimin e tij të vitit 2020, të botuar në Seminars in Pediatric Neurology, i cili zbuloi se nga 44 fëmijë me autizëm dhe autoantitrupa kundër receptorit alfa të folatit, dy të tretat e atyre të trajtuar me këtë ilaç shfaqën përmirësim në gjuhë.
Në një tjetër studim të publikuar në vitin 2018, ai përfshiu 48 fëmijë me autizëm dhe vështirësi në të folur, të cilët morën ose leukovorinë ose një placebo. Pas 12 javësh, ata që u trajtuan me ilaçin treguan “përmirësim në matjet e komunikimit verbal” krahasuar me ata që morën placebon.
Mason nuk është i vetmi fëmijë për të cilin prindërit kanë folur për suksesin me leukovorinën. Një vajzë e vogël, Meghan, e cila mori pjesë në një provë klinike në Institutin Neurologjik Barrow në Spitalin e Fëmijëve të Phoenix, ka shfaqur përmirësime në gjuhë, komunikim, sjellje dhe aftësi sociale.
“Për pak sa nuk u bëmë të bindur se ajo po merrte [leukovorinë kalcium në fazën e parë] sepse pamë ndryshime të mëdha brenda dy javësh nga fillimi i studimit,” tha nëna e saj, Marie. “Ishte vërtet dramatike.”
“Kjo ka përmirësuar shumë jetën tonë familjare,” shtoi ajo.
Megjithatë, ka një problem.
“Leukovorina është një ilaç i vjetër dhe mund të blihet me një çmim shumë të ulët,” tha Frye. “Kështu që askush nuk do të bëjë shumë para nga ai. Nuk ka arsye që ata të investojnë.”
Kjo do të thotë se, për momentin, ilaçi mund të përshkruhet vetëm për autizmin “jashtë etiketës” që do të thotë kur një ilaç përshkruhet për një gjendje që është ndryshe nga ajo për të cilën është miratuar nga FDA.
Sipas, Qendrës për Kontrollin dhe Parandalimin e Sëmundjeve CDC-së, rreth 1 në 36 fëmijë në Shtetet e Bashkuara kanë çrregullim të spektrit të autizmit, një rritje nga 1 në 44 që ishte vlerësuar në vitin 2018./Katror.info
Përgatiti:
