Federata e Futbollit e Kosovës ka filluar për herë të parë kursin për trajnerët e portierëve UEFA GK –B, i cili do të zgjasë deri në prill të vitit 2026. Ky kurs ka nisur me fazën e parë të ligjëratave, ku para 16 kandidatëve kanë ligjëruar instruktorët e UEFA-s, Frank Thieltges nga Gjermania dhe Tomislav Butina nga Kroacia.
Në kuadër të këtij kursi, kandidatët do të ndjekin jo vetëm ligjërata teorike, por edhe punë praktike, monitorime në klube dhe në fund do t’i nënshtrohen provimeve përfundimtare, njofton Federata e Futbollit të Kosovës.
Instruktori i UEFA-s, Frank Thieltges, vlerësoi këtë hap si shumë të rëndësishëm për futbollin kosovar. “Për herë të parë në Kosovë kemi një licencë B për trajnerët e portierëve. Ky është një zhvillim që ndihmon në bashkëpunimin më të madh mes trajnerit të ekipit dhe trajnerit të portierëve. Është e rëndësishme që trajnerët e portierëve të jenë më të përfshirë në stërvitjet e ekipit dhe kjo është rruga e duhur përpara”, tha ai.
Mundesh me e lexu edhe…
Ndërsa instruktori kroat, Tomislav Butina, u shpreh i impresionuar nga niveli i kandidatëve kosovarë. “Siç mund të shihet, në këtë kurs ka shumë përvojë dhe trajnerë të mirë nga Kosova, veçanërisht në rolin e trajnerëve të portierëve. Përparimi që arritën brenda vetëm dy ditëve ishte shumë më i madh sesa pritej. Mund të them se ky është një kurs shumë i suksesshëm”, tha ai.
Njëri nga pjesëmarrësit, Valmir Bytyqi, u shpreh i entuziazmuar për këtë mundësi. “Janë duke u shfaqur njohuri të reja dhe mënyra të punës shumë të evoluara me futbollin modern, ku pjesë e rëndësishme është edhe portieri. Jam shumë i lumtur që jam duke marrë pjesë në këtë kurs dhe tek të gjithë shihet një entuziazëm i madh. Ne jemi grupi i parë që ndjekim këtë kurs, i cili ka qenë shumë i nevojshëm dhe do të na shërbejë shumë në të ardhmen”, tha ai.
Ndërkohë, pjesëmarrësja tjetër, Diellza Musa, theksoi rëndësinë e përvojës së ndarë nga instruktorët. “Kam kënaqësinë që po dëgjoj përvoja nga instruktorë shumë profesionalë dhe besoj se këto instruksione do të na shërbejnë në punën tonë, qoftë me gjeneratat e reja, por edhe me ekipet profesionale”, tha ajo.
Ky kurs po vlerësohet si një hap i madh përpara në zhvillimin profesional të trajnerëve të portierëve në Kosovë dhe është pjesë e strategjisë së Departamentit të Edukimit në FFK drejt ngritjes së standardeve në futbollin e Kosovës. /Katror.info
