Fron Zherka, një djalosh i klasës së tretë në shkollën fillore Ismail Qemali, në Prishtinë, na ka dhënë një shembull gjithë ne të rriturve, për empatinë, solidaritetin dhe zemërgjerësinë. Froni fitimet e librit të tij të poezive “Zëri i Shkronjave”, ka vendosur që t’ia dhurojë Asociacionit Nacional për Autizëm në Kosovë (ANAK).
Ky vendim nuk ka ardhur rastësisht. Ai është frymëzuar nga miqësia e tij e veçantë me një shok klase me autizëm, për të cilën Froni shprehet se përfitimi ka qenë i dyanshëm.
”Unë i ndihmoj atij shumë, por ai më ka mësuar mua se si të jem human”, shprehet Froni.
Mundesh me e lexu edhe…
Nëna e tij, Bleta Zeqiri Zherka, na rrëfen se si ndjenjat e Fronit për këtë kauzë kanë qenë të natyrshme dhe të thella.
“Froni ka shumë shokë, edhe në shkollë këtu në Ismail Qemali që janë prekur me autizëm dhe Froni është shumë i ndjeshëm, edhe, mandej, i ka ardhë vetë dëshira që me ndihmu, që me kontribu sadopak me mundësitë e veta për këta fëmijë. Ai dhe ne mendojmë që duhet të jemi të gjithë njëjtë, të kyçemi në aktivitete të njëjta, të punojmë së bashku në Kosovë. Së fundmi ka qenë i paraparë një aktivitet ku Froni ka qenë i caktuar me u marrë me disa tregime, disa lojëra të ndryshme dhe t’i ndihmojë të gjithë fëmijëve aty që kanë qenë të prekur. Dhe neve na ka pëlqy dhe ka qenë shumë koincidencë, se bash ato ditë Froni e publikoi librin e tij dhe vendosi që krejt të hyrat i merr prej librit me shku në shoqatën e autizmit, dhe na lumturoi shumë, se u përshtat me motivin dhe me kauzën që e pat krejt libri”, thotë ajo.
Sipas Bletës edukimi për vlerat e mira nuk fillon në shkollë, por në shtëpi, dhe në të njejtën kohë ajo konsideron që fëmijët sot janë shumë të përfshirë në aktivitete, gjë që ua lehtëson prindërve punën me ta.
“Besoj që vetëdija jonë është ashtu që edhe fëmijët që janë prekur me i trajtu njëjtë, se e shoh që edhe fëmijët e tjerë janë të inkuadruar shumë në aktivitete tjera që janë jashtë kurrikulare qoftë gjuha angleze, qoftë shkollë e kodimit e kështu, besoj që fëmijët në përgjithësi në ditëve të sotme janë shumë të gjithanshëm dhe besoj që tash jetojmë në kohëra të ndryshme dhe ka me pas shumë efekt edhe për neve si prindër, edhe na po mësojnë prej tyre, këta kanë mësu prej neve, po edhe na po mësojnë prej këtyre shumë, kështu që bashkëpunimi, qysh e dimë, bën fuqinë dhe besoj që kemi me ia dalë së bashku”, shton Bleta.
Jeta Deva, udhëheqëse e Asociacionit Nacional të Autizmit në Kosovë (ANAK), e cila e ka ndjekur nga afër këtë iniciativë, vlerëson se sa e rëndësishme është që aktivizmi të mësohet që në moshë të hershme.
”Për ne ka qenë një akt, aq pozitiv dhe shpresëdhënës që vazhdon me besu përkundrejt padrejtësive që ndodhin për shembull në vendin tonë. Të japë shpresë me pa që ka fëmijë dhe ka njerëz, të cilët nuk minojnë, nuk kufizohen te vetja, por kreativitetin e vet mundohen me shfaq për të mirën e tjetrit, edhe solidarizimi edhe krejt interesimi i tij që ka fillu prej një shoku të klasës, i cili është me autizëm, edhe dashurinë që ky e ka ndje, saqë m’u inspiru në kreativitetin e vet”, thotë Jeta.
Ndërsa Bleta ka një porosi për shoqërinë që të luajnë rolin e tyre në krijimin e një komuniteti më gjithëpërfshirës.
”Të gjithë fëmijët kanë vlera dhe duhet të kenë mundësi që me i arritë ëndrrat e tyre. Pra, ne si shoqëri duhet të krijojmë sa më shumë mundësi gjithëpërfshirëse”, shtoi Bleta.
Froni edhe pse shumë i ri në moshë, angazhohet në shumë aktivitete ku përveç një zemre të hapur, ka shfaqur edhe multi-talentet e tij.
Ai ka fituar medalien e artë në Dubai për aritmetikë mentale, kur ishte vetëm 6 vjeç. Gjithashtu u kualifikua për gara në gjuhën angleze në Francë. Ndërsa, vitin e kaluar fitoi vendin e parë në Tiranë në një kompeticion për kitarë. /Katror.info
Edicionin #78 të plotë e gjeni këtu!
Përgatiti:
