Shumë prindër janë bërë tepër të kujdesshëm ndaj çdo forme të sheqerit në dietën e fëmijëve të tyre. Madje, shpesh edhe frutat – një ndër ushqimet më natyrale dhe të shëndetshme – shihen si të rrezikshme për shkak të përmbajtjes së sheqerit natyral.
Por, frutat nuk janë problemi – ushqimet e përpunuara janë.
Frutat e plota përmbajnë sheqer natyral, i cili shoqërohet me fibra, vitamina dhe minerale të domosdoshme për shëndetin e fëmijëve. Këtu përfshihen vitamina A, C, E, magnezi, zinku dhe acidi folik – lëndë ushqyese që ndihmojnë në zhvillimin dhe rritjen e shëndetshme.
Mundesh me e lexu edhe…
Për më tepër, fibrat që gjenden në lëkurën dhe tulin e frutave ndihmojnë në tretje, ulin kolesterolin e keq dhe mbrojnë shëndetin e zemrës.
Ndryshe nga frutat, sheqernat e shtuara – ato që gjenden në karamele, pije të gazuara, ëmbëlsira dhe ushqime të paketuara – janë ato që duhen shmangur.
Është një mit që sheqeri në vetvete shkakton diabet. Diabeti i tipit 1 është një sëmundje autoimune, ndërsa ai i tipit 2 lidhet më shumë me mbipeshën dhe mënyrën e jetesës sesa me konsumin e sheqerit natyral nga frutat.
Studimet tregojnë se fëmijët që konsumojnë më shumë fruta kanë më pak yndyrë abdominale dhe një rrezik më të ulët për zhvillimin e diabetit të tipit 2.
Ushqimet e përpunuara shpesh përbëjnë një të tretën e kalorive që fëmijët marrin çdo ditë, duke lënë më pak hapësirë për ushqime të shëndetshme si frutat, perimet dhe drithërat e plota. Kjo çon në mungesë të lëndëve ushqyese që janë thelbësore për zhvillimin.
Udhëzimet aktuale dietike për konsumimin e frutave te fëmijët ndryshojnë sipas moshës. Për fëmijët nga 0 deri në 2 vjeç rekomandohet deri në gjysmë racioni frutash në ditë. Nga mosha 2 deri në 3 vjeç rekomandohet një racion në ditë, ndërsa për fëmijët nga 4 deri në 8 vjeç sasia rritet në 1.5 racione në ditë. Fëmijët mbi 9 vjeç këshillohet të konsumojnë dy racione frutash në ditë.
Frutat ndihmojnë fëmijët të ndihen të ngopur dhe të kenë më pak dëshirë për ushqime të paketuara e të varfra në vlera ushqyese./Katror.info
