Togu i Xhenierëve Luftarakë i Forcës së Sigurisë së Kosovës ka përfaqësuar me nder Republikën e Kosovës në garën shumëkombëshe “Dita e Unitetit”, e cila është zhvilluar në kuadër të ushtrimit të gjerë ndërkombëtar “Defender Europe 25” dhe komponentës së tij “Immediate Response 25” në Republikën e Kroacisë.
Në këtë garë prestigjioze, që mblodhi ekipe nga disa shtete partnere të NATO-s dhe rajonit – përfshirë Kroacinë, Gjermaninë, Slloveninë dhe Kosovën – FSK mori pjesë me dy ekipe të Togu të Xhenierëve Luftarakë.
Mundesh me e lexu edhe…
Të dyja ekipet e Forcës së Sigurisë së Kosovës shfaqën aftësi të larta profesionale dhe një përgatitje të shkëlqyer ushtarake, duke arritur rezultate mbresëlënëse: fituan vendin e parë dhe të tretë në mesin e 15 ekipeve pjesëmarrëse.
Gara “Dita e Unitetit” është një ngjarje vjetore që synon të forcojë ndërveprimin dhe bashkëpunimin ndërmjet forcave të armatosura të vendeve aleate dhe partnere, përmes sfidave që testojnë aftësitë fizike, shkathtësitë teknike, punën ekipore dhe bashkërendimin në situata të ndërlikuara taktike.
Pjesëmarrja dhe suksesi i FSK-së në këtë aktivitet dëshmon për nivelin gjithnjë në rritje të profesionalizmit dhe gatishmërisë operacionale të saj.
Ky është gjithashtu një moment historik për Togun e Xhenierëve Luftarakë, pasi për herë të parë ky njësi dislokohet jashtë territorit të Kosovës në kuadër të një ushtrimi ndërkombëtar.
Si një kapacitet i ri brenda strukturave të FSK-së, ky tog është integruar përkohësisht në Brigadën e Mekanizuar të Forcave të Armatosura të Kroacisë, duke shënuar një hap të rëndësishëm drejt zhvillimit të mëtejshëm të bashkëpunimit ndërkombëtar ushtarak dhe rritjes së kapaciteteve ndërvepruese të FSK-së me forca partnere të NATO-s dhe BE-së.
Ky sukses është një dëshmi e përkushtimit të FSK-së për të qenë një forcë moderne, profesionale dhe në përputhje të plotë me standardet ndërkombëtare të mbrojtjes dhe sigurisë. Ai gjithashtu forcon pozitën e Kosovës si një kontribuues i rëndësishëm për paqen dhe sigurinë në rajon dhe më gjerë./Katror.info
