Të mërkurën, më 5 qershor, në orën 20:00, në Teatrin e Gjilanit do të jepet repriza e shfaqjes “God Bless America”, me tekst dhe regji nga Fatos Berisha. Vepra, e mirëpritur nga publiku dhe kritika, rikthehet në skenë për të sjellë edhe një herë reflektim dhe debat mbi realitetin bashkëkohor përmes një komedie të mprehtë dhe provokuese.
“God Bless America” përdor një gjuhë teatrore që ndërthur groteskun me humorin e zi, duke ndërtuar një univers simbolik ku karrocat e supermarketit shndërrohen në elemente dominues të skenës – metaforë e fuqishme për absurditetin e nevojave të krijuara dhe boshllëkut të vlerave në shoqëritë moderne.
Shfaqja vë në qendër mitin e konsumit dhe ëndrrën e shpresës së importuar, duke sfiduar perceptimet kolektive për zhvillimin, lumturinë dhe identitetin. Me ritëm të gjallë dhe skena të paharrueshme, vepra ngre pyetje të thella mbi rolin e individit në një botë të dominuar nga tregu dhe imazhi.
Mundesh me e lexu edhe…
“God Bless America” është një nga prodhimet më të angazhuara të repertorit të Teatrit të Gjilanit, duke ofruar një përvojë ndryshe për publikun që kërkon më shumë se argëtim – një natë teatri që provokon mendimin dhe ndjesinë./Katror.info
