Nga 20 deri më 23 dhjetor 2024, një delegacion prej 55 Rotarianësh nga Distrikti 2485 Shqipëri-Kosovë, i udhëhequr nga Guvernatori Butrint Batalli, vizitoi Sicilinë për të shënuar një moment historik: binjakëzimin dhe nënshkrimin e një Memorandumi të Partneritetit me Distriktin 2110 Sicili (Itali)-Maltë.
Ceremonia u zhvillua në qytetin simbolik Hora e Arbëreshëve, një qendër me rëndësi të veçantë për trashëgiminë kulturore dhe historike arbëreshe.
Në qendër të qytetit, delegacioni u mirëprit ngrohtësisht nga Kryetari i Bashkisë së Horës së Arbëreshëve, Rosario Petta, dhe Presidenti i Këshillit Komunal, Antonino Aclud së bashku me përfaqësues të tjerë të komunës dhe banorë të shumtë.
Mundesh me e lexu edhe…
Ceremonia, që u mbajt në Këshillin Komunal, përfshiu nënshkrimin e marrëveshjes nga Guvernatorët Butrint Batalli dhe Giuseppe Pitari, në prani të qytetarëve dhe rotarianëve nga të dy distriktet.
Në fjalimin e tij, Guvernatori Batalli e vlerësoi komunitetin arbëresh si një urë lidhëse mes popujve dhe kulturave, duke theksuar rëndësinë e ruajtjes së identitetit shqiptar ndër shekuj.
“Arbëreshët janë një shembull i gjallë i fuqisë së shpirtit dhe i qëndresës kulturore, duke ruajtur me krenari gjuhën, traditat dhe identitetin tonë kombëtar ndër shekuj. Ju përfaqësoni jo vetëm të kaluarën tonë të lavdishme, por edhe një urë të fortë që na lidh me të ardhmen. Kontributi juaj në ruajtjen e trashëgimisë shqiptare është një frymëzim për të gjithë ne dhe një pasuri për brezat që do të vijnë” tha ai.
Nga ana tjetër, Guvernatori i Distriktit 2110, z. Giuseppe Pitari, i cili pranoi me entuziazëm propozimin
për binjakëzim nga homologu i tij, z. Batalli theksoi rëndësinë e kësaj marrëveshjeje si një hap i madh për forcimin e lidhjeve mes dy distrikteve Rotariane dhe vendeve tona, për promovimin e aktiviteteve
dhe projekteve të përbashkëta si dhe fuqizimin e miqësisë që pasqyrojnë vlerat thelbësore të Rotary.
Një prej momenteve më të rëndësishme të vizitës ishte mbjellja e një peme ulliri pranë statujës së Skënderbeut, një simbol universal i paqes dhe unitetit. Akti i përbashkët nga guvernatorët Batalli dhe Pitari, së bashku me Presidentin e Këshillit Komunal, pasqyroi angazhimin e përbashkët për të forcuar lidhjet kulturore dhe vlerat rotariane.
Hora e Arbëreshëve, e njohur gjithashtu si Piana degli Albanesi, është një qytet i krijuar nga emigrantët shqiptarë në shekullin XV. Ky vend vazhdon të ruajë gjuhën, kulturën dhe traditat shqiptare, duke përfaqësuar një simbol të gjallë të qëndresës kulturore.
Banorët e saj kanë ruajtur për shekuj me radhë gjuhën, kulturën dhe zakonet shqiptare. Rituali
bizantin dhe flamuri i Gjergj Kastriotit – Skënderbeut që valëvitet krenar në këtë qytet janë pjesë e
përditshme e këtij qyteti, duke përfaqësuar krenarinë kombëtare dhe qëndresën ndër shekuj.
Sot, ky qytet përfaqëson një nga bastionet më të rëndësishme të identitetit arbëresh.
Delegacioni shqiptar e filloi vizitën me një tur në MUSARB – Muzeun e Kulturës Arbëreshe, ku ekspozita të pasura me histori, art dhe tradita shqiptare lanë mbresa të thella. Në vijim, vizitat përfshinë edhe Katedralen e Shën Dhimitrit Megalomartiri dhe binjakëzimet e klubeve rotariane në qytetet Palermo dhe Katania.
Klubet e Distriktit 2485, përfshirë RC Durrës, RC Gjakova, RC Prishtina, dhe RC Gjakova Qabrati, realizuan marrëveshje binjakëzimi me klube prestigjioze nga Distrikti 2110, si RC Palermo Baia dei Fenici, dhe RC Catania Sud.
Këto marrëveshje shënuan një fillim të ri për projekte të përbashkëta, përfshirë bursat për studentët nga Hora e Arbëreshëve si dhe iniciativat arsimore për mësuesit e këtij komuniteti.
Kjo vizitë historike simbolizoi forcimin e lidhjeve kulturore dhe humanitare mes popullit shqiptarë dhe italianë, duke promovuar vlerat universale të paqes dhe zhvillimit.
Përmes frymës së Rotariane , ky bashkëpunim është dëshmi e fuqisë së lidhjeve ndërkombëtare dhe miqësisë në mes popujve. /Katror.info
Përgatiti:
