Në një epokë ku ritmi i jetës është i shpejtë dhe kërkesat janë të larta, gjetja e mënyrave për të ruajtur shëndetin fizik dhe mendor është e një rëndësie të veçantë.
Ecja në këmbë, apo hiking, ofron një mënyrë jetike për të ruajtur shëndetin fizik dhe mendor. E shijuar nga mbi 300 milionë njerëz në mbarë botën, hiking përmirëson aftësinë kardiovaskulare, forcon muskujt dhe ndihmon në menaxhimin e peshës. Gjithashtu redukton stresin, ngre humorin dhe siguron një lidhje të thellë me natyrën. Aspekti social i ecjes forcon marrëdhëniet dhe lidhjet e komunitetit, duke e bërë atë një qasje holistike ndaj mirëqenies së përgjithshme për trupin, mendjen dhe shpirtin.
E në Podujevë këtë mundësi po e ofron organizata e re, Shoqëria për Promovimin e Kulturës dhe Turizmit ‘’ESCAPE’’ aktivitetet e së cilës jo vetëm që kontribuojnë në shëndetin fizik, por gjithashtu ndikojnë pozitivisht në shëndetin mendor, emocional dhe në socializim.
Mundesh me e lexu edhe…
Në një ecje të përbashkët, Dea Stublla, bashkëthemeluese e kësaj organizate, fillimisht na shpjegoi qëllimin e organizatës, si dhe rëndësinë e ecjes nëpër shtigjet e Podujevës.
“Escape ka lindur kur ne vetë jemi arratisë, shumica prej themeluesve të “Escape”, kemi shku nëpër ecje, unë në fakt jo, po kam qenë veç me një ecje, së bashku me grupin të cilët kishin shku edhe më herët, edhe e kam pa që është diçka që po mujsha me bo edhe përnime është një diçka e mirë. Ka lindur pastaj ideja që me bo këtë më formale disi, edhe pse ne tentojmë në atë me qenë më jo-formal që mos me ju duk rinisë ashtu klishe, se pak mundet me ju duk diçka e lodhshme, edhe normal që në fillim ka qenë vështirë se në Podujevë edhe në Kosovë në përgjithësi të rinjtë tash janë mësuar me teknologji e jo me aktivitet diçka më ndryshe. E kjo në fillim normal ju ka ardhur ma ndryshe edhe ju ka ardhur më vështirë me u bind që me marrë pjesë nëpër aktivitete tona.”
Një terren si ky mesatarisht i lehtë, destinacioni i pare ishte monumenti Shpata e Kastriotit për të vazhduar me pikën finale Maja e Kaqandollit, ku përveç pamjes së bukur, mund të shihej edhe rrafshi i Podujevës dhe nga ana tjetër malet kufitare të Mitrovicës. E ndryshe nga kjo “Escape’’ po i dhuron shoqërisë llapjane edhe aktivitete e mundësi të tjera.
“Prej ecjeve të cilat i mbajmë kjo është e disata me radhë. Zakonisht kemi zgjedhë diçka ditë më të veçanta, për shembull ecjen tonë të parë e kemi mbajtur për Ditën e Çlirimit të Podujevës vitin e kaluar, meqenëse ne si organizatë jemi organizatë e re, tash i kemi mbush një vit. Ndërkaq ecjet e tjera zakonisht i mbajmë të dielave, edhe nëpër shtigje jo shumë të zorshme. Ndërkaq e kemi mbajt edhe kampin veror vitin e kaluar, i cili si aktivitet kështu në bashkësi është edhe aktiviteti ynë më i madh, edhe aktiviteti në të cilën kemi shpenzu më së shumti energji, më së shumti mjete, por, po besoj edhe prej të cilit rinia të cilët kanë marrë pjesë, janë nda më të kënaqurit. Po ashtu, një projekt të cilin veç e kemi implementu kohën e fundit është fitnesi në parkun e qytetit të Podujevës, i cili deri tash, për nga ndikimi në komunitet është projekti me ndikimin më të madh.”
Ecjet e tilla përveç aspektit shëndetësor, qëllim kanë edhe promovimin e monumenteve historike, si dhe zbulimin e rrëfimeve dhe marrjen e njohurive të reja nga vendi kur zhvillohet aktiviteti.
“Emri i plotë i organizatës është Sh.P.K.T Escape, apo, Shoqëria për Promovimin e Kulturës dhe Turizmit, për shkak që ne kemi dashtë me prek një gamë më të gjerë të aktiviteteve, jo ashtu me u fokusu komplet te rinia edhe veç me qenë diçka me ta por edhe te natyra edhe te kultura. Për shembull përmes kësaj ecjeje shumica e të rinjve nuk e kanë parë kurrë këtë shteg edhe nuk e kanë ditë as rëndësinë e saj historike, as nuk e kanë parë monumentin “Shpata e Kastriotit”, pra në të njëjtën kohë është shumë mënyrë e mirë që me i promovu fillimisht bukuritë natyrore që Podujeva i ka. “
“Mandej kur rritemi si organizatë pse jo edhe të krejt Kosovës, po ashtu me promovu pak edhe këtë pjesën e kulturës, çka kemi tradita, çka shohim gjëra, p.sh., nganjëherë takojmë edhe njerëz të fshatrave edhe ata ndajnë ndonjë fakt interesant me neve edhe është shumë interesant me pa. Natyrisht që ne fokusohemi edhe në promovimin e natyrës dhe mbrojtjen e saj, edhe sigurisht që minimalja që mundemi me bo është që gjatë çdo shtegu mos me lanë asnjë mbeturinë mbrapa, kujdesemi që me marrë sa më pak qese, pra mu mundu që me promovu sado pak, p.sh. të gjelbrën, të mirën për mjedisin, edhe kur pe shohim vetë qysh po na relakson edhe dobitë që po na i jep, pse jo edhe na mu mundu me mbrojtë sado pak.”
Organizata “Escape” bazuar në qëllim që ka është edhe institucion kyç që ndihmon në frymëzimin e të rinjtë duke u ofruar platforma për të shprehur zërin e tyre, për të zhvilluar aftësi të reja dhe për të qenë aktiv në shoqëri. Shembull për këtë është edhe Eris Ejupi, i cili me organizatën Escape ka gjetur një marrëdhënie të shkëlqyer të bashkëpunimit vullnetar.
“Me këtë organizatë jemi njoftu si grup shoqëror njëherë, sepse një grup shoqëror i jemi e ka fillu këtë organizatë, edhe në bazë tyre kam fillu edhe unë me aktivitete, me ecje, pastaj më është ofruar mundësia që në qoftë se dua, me marrë kontent edhe me kriju kontent për Social Media, me kriju postera edhe pak a shumë me u marrë me pjesën e komunikimit të mediave.”
“Kur më ka ardh si mundësi, më ka ardh shumë mirë, për shkak se Podujeva ka pasur nevojë për një organizatë e cila merret me Hiking, Camping, edhe për stimulimin e njerëzve për me dalë në natyrë. Podujeva ka shumë pjesë të mira për me dalë po nuk është që ka pasur shumë frekuentim, edhe aty ia ka filluar interesimi im edhe këtë punë e bëj në baza vullnetare. Edhe shumë interesant që e kryej në baza vullnetare edhe e du shumë këtë punë, sepse Podujeva ka pasur shumë nevojë për kësi aktivitete edhe është diçka që që e bëjmë me shumë qejf me krejt pjesëtarët e Escape,” thotë Erisi.
Rëndësia e këtyre organizatave është shumëdimensionale sepse kontribuojnë në zhvillimin individual dhe kolektiv. Një nga përfitimet më të mëdha të përfshirjes në organizatat e tilla sidomos ato rinore është zhvillimi personal dhe profesional i individëve.
“Escape më ka ndihmu shumë në punën time profesionale, përveç që kam pas mundësi me ushtru këtë punë në “real time”, pra në kohë reale gjithashtu më ka ndihmu me njoftu edhe shumë njerëz me interesa të përbashkëta edhe prej tyre me zhvillu edhe karrierën time personale.”
“Escape” përgatitet në mënyrë profesionale për aktivitetet që mbajnë, duke filluar nga bartja me vete e ndihmës së parë, për të cilën janë të çertifikuar disa anëtarë të grupit.
“Ne para se me fillu ecjen zakonisht ju kallzojmë se çka duhet me pasë me veti në mënyrë që mos me ju ra energjia, pyesim nëse dikush ka probleme shëndetësore, edhe zakonisht na afrohen vetë me na tregu që dikush pinë “këso” hapa… edhe pak a shumë nëse kanë pasë ndonjë lëndim apo diçka. Nëse ka lëndime për shembull ndonjë gërvishtje a diçka që mundet me u kry me ndihmë të parë ne gjithmonë jemi me ndihmë të parë me veti, edhe disa persona jemi të certifikuar për ndihmë të parë.’’
E ata që u bënë pjesë e Escape vazhdojnë të jenë entuziastë për aktivitetet e radhës. Ndërsa ajo që vihet në pah, është mënyra se si këto aktivitete kontribuojnë në rritjen e solidaritetit me njëri tjetrin dhe gatishmëria për të qenë kontributdhënës.
“Të gjithë, përpos neve pjesëtareve të organizatës ata që kanë filluar nuk na kanë lanë kurrë, edhe non stop kur pauzojmë prej aktiviteteve na pyesin ton-kohën “kur ka me u bo ecja e radhës? – Po i thomë një shoqës, shokut…” edhe zakonisht e kanë atë me pyet se çka duhet me pagu, edhe ne si Escape, për me heq këtë pjesë, jemi mundu që me anë të projekteve gjithë me mbulu edhe pjesën, jo vetëm të transportit, por edhe të ushqimit në mënyrë që me bo ma të lehtë për ata që kanë me ardhë, se jo veç që është diçka e panjohur për ta, po zakonisht mendojnë që dikush është tu e bo qet send për përfitim, edhe vlen me cekë që vullnetarisht punohet prej krejt anëtarët e organizatës.’’
Shpenzimi i kohës në natyrë është i lidhur me uljen e niveleve të stresit, ankthit dhe depresionit. Peizazhet natyrore dhe ajri i pastër krijojnë një ndjenjë qetësie dhe relaksi, duke ndihmuar në pastrimin e mendjes dhe përmirësimin e humorit. Me këto aktivitetet në natyrë “Escape” gjithashtu po nxitë një ndjenjë të lidhjes me botën natyrore, duke na rikujtuar bukurinë dhe harmoninë e saj./Katror.info
Edicionin #55 të plotë e gjeni KËTU 🙂
Përgatiti:
