Qeveria e Hungarisë do të kufizojë marzhin e fitimit për shitësit ushqimorë në një numër artikujsh ushqimorë bazë, ka deklaruar të martën kryeministri Viktor Orban, në përgjigje ndaj inflacionit në rritje që po godet konsumatorët në vendin e Evropës Qendrore.
Orban ka thënë në një video në mediat sociale se shitësit ushqimorë komercialë duhet të kufizojnë çmimin e tyre në jo më shumë se 10% të çmimit të shitjes me shumicë për 30 artikuj të ndryshëm ushqimorë, një politikë që do të jetë në fuqi nga mesi i marsit deri në fund të majit, por mund të zgjatet, raporton AP.
Ai ka thënë se qeveria do të monitoronte pajtueshmërinë e shitësve ushqimorë me politikën, por nuk ka specifikuar se cilat ushqime do të përfshiheshin në kërkesë.
Mundesh me e lexu edhe…
“Për të frenuar rritjet e tepërta dhe të pajustifikuara të çmimeve, ne kemi negociuar me përfaqësuesit e zinxhirëve tregtarë ditët e fundit. Fatkeqësisht, ofertat e shitësve ishin shumë larg pritjeve tona”, ka thënë Orban.
Të dhënat e inflacionit të publikuara të martën nga zyra statistikore e Hungarisë treguan një normë vjetore të inflacionit prej 5.6% për muajin shkurt, ndërsa çmimet e ushqimeve u rritën me 7.1% në vit.
Ndërkohë, inflacioni mesatar në eurozonën 20-anëtarëshe ishte 2.4% në shkurt, sipas zyrës statistikore të Bashkimit Evropian “Eurostat”.
Hungaria, e cila nuk është anëtare e eurozonës, përdor forintën si monedhën e saj kombëtare.
Hungaria ka udhëhequr shpesh BE-në në inflacion vitet e fundit, pasi kriza e kostos së jetesës ka kapluar vendin.
Qeveria populiste ka vënë në dukje faktorët e jashtëm si lufta në Ukrainën fqinje dhe sanksionet e BE-së kundër Rusisë për të shpjeguar spiralen e inflacionit prej vitesh, megjithëse çmimet në vende të tjera të rajonit si Polonia, Rumania dhe Sllovakia nuk janë rritur aq shumë. /Katror.info
Përgatiti:
