Një pajisje e re teknologjike, e krijuar për të aktivizuar në mënyrë të sigurt reagime të fuqishme imunitare kundër formave më të vështira të kancerit, ka treguar rezultate premtuese në luftën ndaj melanomës metastatike, tumoreve të pankreasit dhe zorrës së trashë.
I quajtur “fabrika e citokinës”, implanti u zhvillua nga hulumtuesit në Rice University në Teksas. Pajisja vendoset pranë tumorit dhe shpërndan qeliza të modifikuara që lëshojnë proteinën interleukin-12 (IL-12), e cila aktivizon një grup të veçantë qelizash imunitare të quajtura Tpex—të cilat janë çelësi për krijimin e një përgjigjeje të qëndrueshme kundër tumorit.
Sipas studimit të publikuar në Journal of ImmunoTherapy of Cancer, kjo qasje ka eliminuar me sukses tumoret, si ato pranë implantit, ashtu edhe ato në zona të largëta të trupit, në modele të kancerit te minjtë dhe primatët jo-njerëzorë, përcjell Katror.info.
Mundesh me e lexu edhe…
“E kemi dizajnuar këtë teknologji për të rritur efikasitetin e imunoterapisë, duke minimizuar njëkohësisht efektet anësore—diçka shumë e rëndësishme në trajtimin e kancereve agresive,” tha profesori Omid Veiseh, udhëheqës i studimit.
Studiuesit planifikojnë të paraqesin aplikimin për testime klinike në fillim të vitit të ardhshëm në SHBA dhe të themelojnë një kompani bioteknologjike që do të fokusohet në zhvillimin e mëtejshëm të kësaj pajisjeje.
Sipas ekspertëve, IL-12 dallon nga citokinat e tjera sepse gjeneron një përgjigje më të fortë dhe të qëndrueshme imunitare, duke aktivizuar një larmi më të gjerë qelizash kundër tumorit. Ky zbulim shihet si një hap i rëndësishëm drejt terapive më efektive për pacientët me kancer metastatik. /Katror.info
Përgatiti:
