Së shpejti azilkërkuesit në Austri nuk do të kenë më të drejtë të tërheqin pjesëtarët e afërt të familjes. Kjo u vendos nga tri partitë e koalicionit të ri qeverisës në Vjenë.
Qeveria në Austri, ashtu sikurse kishte deklaruar ka vendosur të ndërpresë bashkimin e familjes për ata që kanë të drejtë azili në këtë vend. Kabineti qeveritar në Vjenë ra dakord për këtë ndryshim në ligjin e azilit. Kjo masë sa më shpejt të jetë e mundur duhet të votohet në Këshillin Kombëtar, të miratohet në parlament dhe do të jetë e përkohshme, bëhet e ditur nga zyra e kancelarit.
Kancelari Christian Stocker i partisë popullore konservatore (ÖVP) e argumentoi këtë hap, me tejkalimin e kapaciteteve pranuese të Austrisë – veçanërisht në sektorin e arsimit ka mbingarkesë. Në vitet 2023 dhe 2024 në kuadrin e bashkimit familjar në Austri kanë hyrë gjithsej 18.000 persona, ndër ta 13.000 minorenë në moshë të detyrimit shkollor, tha Stocker. Në sfondin e këtyre shifrave, është e kuptueshme, “që ne duhet të veprojmë konform përgjegjësisë sonë dhe të vendosim frenat për një periudhë të caktuar”, tha kancelari. Austria ka rreth 9,2 milionë banorë.
Mundesh me e lexu edhe…
Shkelje ndaj së drejtës europiane?
Kjo nismë është ligjërisht e diskutueshme. Kritikët konsiderojnë, se ajo përbën shkelje ndaj së drejtës së azilit sipas Konventës Europiane të të Drejtave të Njeriut. Koalicioni i ri qeverisës në Austri i përbërë nga konsrvatorët (ÖVP), socialdemokratët (SPÖ) dhe liberalët NEOS i referohet klauzolës së emergjencës në legjislacionin e BE-së. Kjo klauzolë parashikon, që në rast të kërcënimit të rendit publik dhe sigurisë së brendshme të një vendi anëtar nuk vlen më prioriteti i së drejtës europiane kundrejt ligjit kombëtar të vendit anëtar.
Javën e kaluar ministri i Brendshëm austriak Gerhard Karner u angazhua në nivelin e BE-së për pezullimin e bashkimit familjar për azilkërkuesit. Në një shkresë drejtuar Komisionit të BE-së ministri i ÖVP argumenton, se sektorët e strehimit, shëndetësisë dhe arsimit në Austri janë të mbringarkuar. Ai iu referua kriminalitetit ndër të rinjtë.
Tani tha ministri i Brendshëm, edhe nëse prej rreth një viti numri i bashkimeve të familjes ka rënë ndjeshëm edhe për shkak të kontrolleve dhe krahasimeve të ADN-së kjo tendencë duhet siguruar në mënyrë të qendrueshme. Në shkurt 2024 sipas të dhënave rreth 1000 persona u regjistruan si të afërm familjeje që kanë hyrë në vend, në shkurt 2025 shifra ishte vetëm 60.
Sekretari i Punëve të Brendshme Jörg Leichtfried nga socialdemokratët bëri të qartë, se qëllimi i përbashkët i qeverisë austriake është, që të ulet në zero migracioni i parregullt. Kjo nuk ndryshon asgjë sa i përket së drejtës së azilit./DW /Katror.info
Përgatiti:
