Arwa Damon, korrespodentja e CNN në Lindjen e Mesme, që ka rrëmbyer pesë çmime Emmy, ka ndarë sot me gazetarët kosovarë rrugëtimin e saj profesional duke ofruar një perspektivë të vlefshme për gazetarinë. Ajo i tha Katror Media se Kosova ka një potencial për t’u bërë shembull i gazetarisë profesioniste për vendet që dalin nga lufta.
“Duke pasur parasysh fushat në të cilat zakonisht angazhohem, mendoj se Kosova ka një nga shanset më të mira nga të gjitha vendet qe dalin nga lufta për t’u bërë një shembull udhëheqës se si mund të bëhen gjërat siç duhet. Por shumë nga kjo, natyrisht, do të përcaktohet nga e ardhmja e afërt dhe nga fakti nëse liritë mediatike do të respektohen në të vërtetë apo jo, nëse mund të ketë një dialog në nivelin ku është i nevojshëm për të mundësuar pajtim të vërtetë dhe llogaridhënie për të kaluarën.”
“Gjithmonë ekziston rreziku që gjërat të mbulohen dhe të paraqiten në një dritë më të butë, sepse është shumë e vështirë të përballesh me disa të vërteta të hidhura nga e kaluara jonë. Megjithatë, kam ndjesinë se Kosova e ka këtë mundësi të artë. Mund të bëhet një shembull se si të bëhen gjërat siç duhet, potencialisht,” tha ajo.
Mundesh me e lexu edhe…
Në një diskutim të hapur me gazetarët në Prishtinë, Damon rrëfeu sesi hapat e saj të parë në CNN ishin plot sfida, por edhe mundësi për të mësuar. Ajo e përshkroi këtë periudhë si një fazë ku iu dha hapësira për të bërë gabime dhe për të nxjerrë mësime të rëndësishme prej tyre.
“Duhet ta pranoj, isha e tmerrshme. Isha e papërballueshme në ekran. Ishte një përvojë shumë poshtëruese. Duhej të gëlltisja egon dhe të punoja pa pushim për t’u përmirësua. Është e vështirë të dalësh në kamera kur e di që nuk je aq e mirë. Por pata shumë fat, sepse CNN më lejoi të bëja gabime në transmetimin e tyre. Dhe pastaj, natyrisht, karriera ime nisi të zhvillohej. Kam qenë në Bagdad për rreth shtatë vjet, nga 2003 deri në 2010. Më pas u transferova në Bejrut, dhe pastaj nisi Pranvera Arabe – Egjipti, Libia dhe më pas shpërtheu lufta në Siri, kishte shumë punë me Sirinë. Më pas u transferova në Stamboll dhe aty u bëra një nga korrespondentet kryesore të udhëtimit për CNN”, shtoi ajo.
Damon e sheh gazetarinë si një profesion që nuk mund të pretendojë objektivitet absolut, por që duhet të bazohet gjithmonë në fakte. Ajo theksoi se realiteti nuk mund të paraqitet i ndarë nga këndvështrimi i gazetarit, duke theksuar se per të, detyra kryesore e një gazetari është t’i japë zë të vërtetës përmes tregimeve që ndihmojnë publikun të kuptojë më mirë botën.
“Detyra jonë nuk është të jemi objektivë. Detyra jonë është të jemi të sinqertë dhe pikë. E vërteta nuk është domosdoshmërisht objektive, dhe ju nuk mund të barazoni disa gjëra me njëra-tjetrën. Pra, detyra jonë është të jemi të sinqertë. Nëse përpiqemi të bindim veten se jemi disi objektivë, ne po gënjejmë veten. Ne nuk jemi krijesa objektive. Ne jemi krijesa subjektive. Objektiviteti është diçka si një konstrukt i rremë. E vërteta është gjëja më thelbësore dhe vendimtare”, thekson ajo.
Përveç gazetarisë, Damon është edhe themeluese e organizatës humanitare INARA (International Network for Aid, Relief, and Assistance), e cila ofron ndihmë mjekësore për fëmijët e prekur nga luftërat, veçanërisht në Lindjen e Mesrme. Lidhur me këtë angazhimi të saj për kauza humanitare ajo paraqet rolin e gazetarisë përtej profesionit.
“Dua të them, po, jemi gazetarë, por mbi të gjitha jemi qenie njerëzore. Dhe nëse sheh dikë që ka nevojë për ndihmë, qoftë edhe dikë që është i etur dhe i duhet një shishe ujë, sigurisht se mund ta intervistosh duke e pyetur se sa i etur është. Pastaj e fik kamerën dhe i jep një shishe ujë. Por, këtë nuk e bën para kamerës, apo jo?”, thotë ajo.
Vizita e saj në Kosovë u organizua nga Asociacioni i Gazetarëve të Kosovës (AGK), Xhemail Rexha, tha se sjellja e gazetarëve ndërkombëtarë si Arwa Damon, në Kosovë është e një rëndësie të veçantë, sepse siç thotë ai ndihmon në pasurimin e perspektivave të gazetarëve tanë.
”Ne gjithë mund ta shohim rrëfimin e saj online, por është ndryshe siç e patë edhe vet se është ndryshe të vijë këtu dhe të ndodh kjo prehja njerëzore e rrëfimit, dhe absolutisht jemi të nderuar si AGK, jo vetëm për këtë që e pamë por edhe për ta shfaqur filmin e saj dokumentar ”Ngjitja në Maje”, që flet për historinë e 4 personazheve që i kanë mbijetuar luftës dhe ngjitën bashkë në Kilimanxharo. Natyrisht që Kosova duke e përjetuar luftën, është shumë e rëndësishme për brezat e rinj të gazetarëve që këtu ende ka probleme këtu në raportim në këto zona, të marrim këshillat më të mira se si duhet ta themi të vërtetën gjithmonë, paavrësisht kushteve, pavarësisht emocioneve që mund ti kemi. Pra, roli i gazetarit, ta thotë atë që e sheh, ta thotë të vërtetën”, ka thënë Rexha.
Në kuadër të kësaj vizite, Damon zhvilloi diskutimin në Librarinë Dukagjini dhe prezantoi dokumentarin e saj “Ngjitja në maje” në Kino Armata, një histori e jashtëzakonshme e katër individëve që kapërcejnë kufizimet e tyre për të arritur majën e Kilimanxharos. /Katror.info
Përgatiti:
