Katër studiues nga Kosova morën pjesë në Kongresin e 28-të Botëror të Shkencave Politike të organizuar nga Shoqata Ndërkombëtare e Shkencave Politike (IPSA), i mbajtur nga data 12 deri më 16 korrik 2025 në Qendrën e Konventave dhe Ekspozitave Coex në Seul, Koreja e Jugut.
Pjesëmarrësit nga Kosova ishin Mehdi Sejdiu nga Universiteti i Heidelbergut, Shpresa Kaciku-Balija nga Universiteti “Haxhi Zeka” në Pejë, Jeta Abazi Gashi nga Universiteti i Prishtinës dhe Gentiana Fana nga Universiteti i Zagrebit.
Kongresi u zhvillua në bashkëpunim me Shoqatën Koreane të Shkencave Politike (KPSA) dhe me mbështetjen e plotë të qeverisë së Koresë së Jugut, qytetit të Seulit dhe institucioneve akademike dhe profesionale të vendit pritës.
Mundesh me e lexu edhe…
Me mbi 3,370 pjesëmarrës nga më shumë se 95 vende të botës, ky ishte kongresi më i madh në historinë 76-vjeçare të IPSA. Programi përfshiu 3,053 punime, 776 panele, katër seanca plenare dhe gjashtë sesione ndarjeje çmimesh.
Tema kryesore e kongresit ishte “Rezistenca ndaj Autokratizimit në Shoqëritë e Polarizuara” dhe u trajtua në një sërë sesionesh të dedikuara.
IPSA thekson se 44% e pjesëmarrësve ishin gra, si pjesë e përpjekjeve për përfaqësim dhe përfshirje më të gjerë në shkencat politike./Katror.info
