Barcelona e trajnerit Hansi Flick e ka mundësinë që ta mbyllë edicionin me katër trofe. Rrugëtimin drejt këtij suksesi e vazhdon të shtunën nga ora 22:00 në stadiumin “La Cartuja” të Sevillas. Në “El Clasicon” e radhës ndaj Real Madridit, Barça e luan finalen e Kupës së Mbretit.
Skuadra e madhe nga Katalunja është gjysmëfinaliste e Ligës së Kampionëve, udhëheq në La Liga dhe vlerësohet aktualisht si më e mira në Spanjë. Tashmë e ka fituar Superkupën e Spanjës. Ndërkohë Real Madridi i trajnerit Carlo Ancelotti mund t’i fitojë dy trofetë vendorë. Është në finale të Kupës e po ashtu në garë për titull të kampionit.
Madridi ka mbetur katër pikë prapa Barçës në La Liga, ndërsa klasikja spanjolle në kuadër të ligës do të luhet muajin tjetër. Deri në fund të edicionit në La Liga janë edhe pesë xhiro.
Mundesh me e lexu edhe…
Por, gjigantët spanjollë të futbollit fillimisht e kanë gjithë fokusin te finalja e Kupës.
Barcelona ka qenë superiore ndaj Madridit në dy klasiket e këtij edicioni. Fitoi 4:0 në La Liga në muajin tetor në “Santiago Bernabeu” . Më pas fitoi 5:2 në finale të Superkupës së Spanjës. Turneu i Superkupës u zhvillua në Arabinë Saudite në janar.
Barcelona ishte shumë më e mirë se Real Madridi në dy ndeshjet e kaluara, por tekniku gjerman nuk ka asgjë tjetër përveç lëvdatave për italianin Ancelotti.
“Real Madridi ka ekip të jashtëzakonshëm dhe njërin prej trajnerëve më të mirë në botë. Ancelotti ka fituar çdo gjë”, ka thënë Flick. “Ai është zotëri dhe e kam gjithë respektin për të. Të shtunën ne luajmë në finale ndaj Real Madridit dhe natyrisht ndaj Carlos”.
Ancelotti duhet që të gjejë rrugën për ta ndalur Pedrin në mesfushë si dhe dyshen shpërthyese të krahëve, Lamine Yamal dhe Raphinha.
Madridi i ka humbur 12 ndeshje këtë edicion, ndërsa në kampanjën e kaluar i kishte vetëm dy humbje në të gjitha garat.
Rrugëtimin drejt finales në “La Cartuja”, Barcelona e bëri duke e kaluar Real Betisin dhe Atletico Madridin. Për Barcelonën është finalja e parë në Kupën e Mbretit që prej vitit 2021, kur fitoi ndaj Athletic Bilbaos.
Real Madridit, që së fundmi trofeun e Kupës së Mbretit e fitoi në vitin 2023, iu desh goli i vazhdimeve i shënuar nga Antonio Rudiger, për ta eliminuar në gjysmëfinale Real Sociedadin me rezultatin e përgjithshëm 5:4.
Pas eliminimit nga Liga e Kampionëve nga Arsenali, Real Madridi e kërkon me çdo kusht fitoren ndaj Barcelonës, për ta mbyllur edicionin me të paktën një trofe.
Ekipet do të luajnë pa disa prej lojtarëve kryesorë.
Barcelona do të jetë pa Robert Lewandowskin në sulm dhe Alejandro Balden në krahun e majtë të mbrojtjes. Madridi nuk do ta ketë Eduardo Camavingan që e ka humbur sezonin. Francezi Kylian Mbappe mungoi në fitoren 1:0 në udhëtim te Getafe të mërkurën mbrëma, teksa është duke u rikuperuar nga një lëndim në nyjën e këmbës. Por, Ancelotti ka thënë se ai mund të jetë i gatshëm për lojë.
Mbappe u fishkëllye nga tifozët e Madridit në fitoren ndaj Athletic Bilbaos vikendin e kaluar, kur fytyra e tij u paraqit në ekranin gjigant në “Bernabeu”. Ai shpreson që ta fitojë trofeun e parë madhor në Spanjë me klubin mbretëror, pas trofeut të Superkupës së Evropës dhe Kupës Interkontinentale.
Kur Madridi në formacion e ka Mbappen bashkë me Vinicius Juniorin, Jude Bellinghamin dhe Rodrygon, ekipi vuan në pjesën defensive.
“Ndoshta rivalët janë favoritë, por finalja është finale dhe çdo gjë mund të ndodhë”, ka thënë Ancelotti.
“Duhet të mbrohemi mirë dhe jam i bindur se do të mbrohemi mirë dhe do të kemi mundësi në sulm”.
Barcelona në formacion pritet ta ketë Gerard Martinin në krahun e majtë si zëvendësues të Baldes. Ai mund të vihet përballë Rodrygos, braziliani i cili nuk ka shënuar në 11 ndeshjet e fundit.
“Në nivelin e statistikave ai duhet të performojë. Edhe pse nuk ka shënuar përgjatë kësaj kohe, ai mund të shënoj herët apo vonë”, ka bërë shaka Ancelotti.
“Në ndeshje të tilla ai ka shënuar gjithmonë dhe kam besim të plotë në të”.
Rodrygo i kishte shënuar të dy golat në triumfin e Madridit ndaj Osasunas në finalen e Kupës së Mbretit dy vjet më parë. Ishte trofeu i 20-të i klubit. Barcelona e mban rekordin me trofe në këtë garë, 31 në total. Vendin e dytë e mban Athletic Bilbao me 24 trofe, ndërsa Madridi është i treti./KOHA/Katror.info
Përgatiti:
