Ministri në detyrë i Mbrojtjes së Kosovës, Ejup Maqedonci, është takuar sot në Ankara me ministrin e Mbrojtjes së Turqisë, Yaşar Güler, ku kanë zhvilluar një takim të frytshëm mbi bashkëpunimin dypalësh dhe zhvillimet e fundit gjeopolitike.
Gjatë takimit, ministri Maqedonci ka theksuar rëndësinë e mbështetjes që Kosova po merr nga Turqia në avancimin e Forcës së Sigurisë së Kosovës (FSK), duke vënë theksin në nevojën për thellim të mëtejmë të bashkëpunimit ushtarak.
Një prej temave kryesore të diskutimit ishte edhe roli strategjik që pritet të ketë Kosova në rajon pas funksionalizimit të fabrikës së municionit. Ky projekt, sipas ministrit Maqedonci, do të sjellë vetëqëndrueshmëri logjistike për FSK-në dhe do të rrisë ndjeshëm kapacitetet mbrojtëse të vendit, duke kontribuar në sigurinë dhe stabilitetin rajonal.
Mundesh me e lexu edhe…
Ministrat u dakorduan për vazhdimin e bashkëpunimit të ngushtë mes dy vendeve, duke e cilësuar atë si element kyç për sigurinë dhe paqen në rajon./Katror.info
