Oda Ekonomike Gjermano-Kosovare (OEGJK) mori pjesë në edicionin e 11-të të BME Purchasing Initiative Western Balkans, të mbajtur në Nuremberg, ku përfaqësoi dhe mbështeti tri nga kompanitë e saj anëtare: Bizmark, Hymeri Metals dhe Proton Cable. Kjo ngjarje ndërkombëtare e rëndësishme vazhdon të jetë një platformë kyçe për lidhjen e furnitorëve nga Ballkani Perëndimor me blerës gjermanë dhe më gjerë, shkruan Katror.info.
OEGJK u përfaqësua nga Drejtori Ekzekutiv, Besnik Vasolli, dhe Asistentja e Projektit, Jeta Syla, të cilët shoqëruan kompanitë pjesëmarrëse dhe asistuan në organizimin e takimeve gjatë programit dyditor. Kompanitë nga Kosova zhvilluan 20 takime B2B me blerës gjermanë, ku patën mundësinë të prezantojnë produktet, kapacitetet dhe standardet e tyre të punës, duke dëshmuar gatishmërinë e sektorit privat të Kosovës për të kontribuar në zinxhirët evropianë të furnizimit.
Ngjarja u organizua nga BME – Bundesverband Materialwirtschaft, Einkauf und Logistik e.V., e cila për vite me radhë ka ndërtuar ura bashkëpunimi mes kompanive të Ballkanit Perëndimor dhe industrive gjermane. Edhe këtë vit, BME siguroi një ambient profesional dhe të strukturuar për nxitjen e kontakteve të reja afariste dhe thellimin e bashkëpunimit ekonomik ndërmjet rajonit dhe Gjermanisë.
Mundesh me e lexu edhe…
OEGJK shpreh mirënjohjen e saj të thellë për organizatorët dhe partnerët institucionalë që kontribuuan në realizimin e këtij edicioni, përfshirë ekipin e BME-së, dhomën IHK Nürnberg für Mittelfranken, Germany Trade & Invest (GTAI), Ministrinë Federale për Çështje Ekonomike dhe Energji (BMWK), Ost-Ausschuss der Deutschen Wirtschaft dhe rrjetin e Dhomave të Tregtisë Gjermane Jashtë Vendit (AHK).
Në përmbyllje të aktivitetit, OEGJK theksoi rëndësinë e këtyre platformave për rritjen e prezencës ndërkombëtare të bizneseve kosovare dhe u shpreh krenare që komuniteti i biznesit të Kosovës po njihet gjithnjë e më shumë si një partner i besueshëm dhe konkurrues në tregjet evropiane. Përfaqësuesit e OEGJK-së theksuan se do të vazhdojnë të ndërtojnë mbi lidhjet dhe mundësitë e krijuara në Nuremberg, me synim fuqizimin e mëtejshëm të eksportit dhe bashkëpunimit ekonomik mes Kosovës dhe Gjermanisë./Katror.info
