Kosova, me resurset e kufizuara që disponon, është një nga shtetet me sasinë më të vogël të ujit në rajon, ka njoftuar Kryeministri Albin Kurti, duke theksuar rëndësinë e menaxhimit të kujdesshëm dhe strategjik të burimeve natyrore të vendit.
Këtë e bëri të ditur përmes një postimi në rrjete sociale.
”Burimet tona ujore i ngjajnë një pjate të kthyer përmbys ku uji që buron në vendin tonë, përfundon jashtë vendit. Me resurset e kufizuara që kemi, jemi ndër shtetet me sasinë më të vogël të ujit në rajon” tha ai.
Mundesh me e lexu edhe…
Kryeministri Albin Kurti ka theksuar se Liqeni i Ujmanit ka një rëndësi të madhe për vendin tonë, pasi është liqeni më i madh në Kosovë.
”E sa për të rikujtuar rëndësinë qenësore që Liqeni i Ujmanit ka për vendin tonë, ai është liqeni më i madh i ynë. Me kapacitet maksimal 328.75 milionë m³ ai si i vetëm ka vëllim trefish më të madh sesa tre liqenet e tjera kryesore, Radoniqi, Batllava dhe Badovci, marrë së bashku. Gjendja aktuale, na mëson se në njërën anë kemi pak burime të ujit e në anën tjetër ato janë të centralizuara. Gjithashtu, na dikton nevojën jetike që burimet ujore t’i menaxhojmë mirë, t’i mbrojmë me kujdes dhe t’i shtojmë me prioritet” theksoi ai.
Kryeministri gjithashtu nënvizoi se në këtë drejtim, projektet përfshijnë ndërtimin e rezervuarëve të rinj si ai në Firajë (16.5 milionë m³), Shtime (113 milionë m³), Pollatë (37.5 milionë m³), Desivojcë, Kremenatë, Gjyrishevc, Kuçicë, dhe Dragaqinë, të cilët së bashku shtojnë një kapacitet prej 204 milionë m³.
“Ato janë pjesë thelbësore e strategjisë sonë për të përballuar sfidat klimatike, duke përfshirë thatësirat dhe përmbytjet, dhe për të garantuar furnizim të qëndrueshëm me ujë për të gjithë vendin. Projekte të tjera, si rehabilitimi i rrjeteve të ujësjellësit në Gjakovë, Gjilan, Ferizaj dhe Prizren, investimet tona në impiante të ujërave të zeza që tashmë kanë përfunduar në Pejë, Gjakovë, Prizren, trefishimi i stacioneve hidrologjike dhe meteorologjike, duke krijuar një sistem të avancuar të paralajmërimit të hershëm për përmbytjet dhe thatësira, gjithashtu kontribuojnë në reduktimin e humbjeve të ujit, përmirësimin e cilësisë dhe rritjen e kapacitetit për përdorimin e ujit të pastër për pije dhe ujitje”, ka shkruar Kurti.
Në fund, ai tregoi për pjesëmarrjen e tij në konferencën përmbyllëse të projektit “Promovimi i Qasjes Universale në Ujë të Pastër”, organizuar nga Rilindja e Gjelbër dhe financuar nga Zyra e Bashkimit Evropian në Kosovë, të cilët i falenderoi për ftesën dhe bashkëpunimin në këtë nismë e cila sipas tij është edhe dëshmi e angazhimit të përbashkët për një të ardhme më të mirë. /Katror.info
Përgatiti:
