Kosova ka shënuar një nga rritjet më të larta ekonomike në Evropë për vitin 2024, duke ruajtur stabilitetin makroekonomik dhe përshpejtuar reformat kyçe. Ky përparim u vlerësua në konferencën e përbashkët për media të Ministrit të Financave, Punës dhe Transfereve, Hekuran Murati, Shefit të Misionit të Fondit Monetar Ndërkombëtar (FMN) në Kosovë, David Amaglobelie dhe Guvernatorit të Bankës Qendrore, Ahmet Ismaili, me rastin e përfundimit të dy programeve dyvjeçare të mbështetura nga FMN.
Programi i Aranzhimit për Gatishmëri (SBA), me vlerë 100 milionë euro, dhe Programi i Resiliencës dhe Qëndrueshmërisë (RSF), prej 80 milionë eurosh, u përmbyllën me sukses, duke siguruar mbështetje për zhvillimin ekonomik dhe energjinë e ripërtëritshme në Kosovë, thuhet në një njoftim të Ministrisë së Financave.
Shefi i Misionit të FMN-së në Kosovë, David Amaglobeli, citohet ta ketë përgëzuar Qeverinë dhe Bankën Qendrore të Kosovës (BQK) për progresin e arritur, duke nënvizuar se Kosova ka pasur një rritje të lartë ekonomike dhe një stabilitet të qëndrueshëm financiar.
Mundesh me e lexu edhe…
Ai vlerësoi progresin e konsiderueshëm të arritur gjatë programit, duke theksuar rritjen e fortë ekonomike prej 4.1 për qind, më e larta në Evropë. Ai përmendi gjithashtu rritjen e punësimit dhe pagave, përmirësimin e transparencës dhe forcimin e kapaciteteve institucionale të Bankës Qendrore të Kosovës.
“Më vjen mirë që është arritur një progres i konsiderueshëm dhe është kryer me sukses programi. Gjatë dy viteve të fundit është bërë shumë progres dhe objektivat që kishim vendosur fillimisht për programet janë arritur me sukses. Më lejoni të ndalem për pak minuta për të elaboruar disa çështje kryesore. Së pari, për stabilitetin makroekonomik. Gjatë këtij programi kemi dëshmuar një rritje të fortë ekonomike, me 4.1% rritje në vitin 2023. Vlerësojmë se rritja në 2024 do të jetë 4.4%, një nga më të lartat në Evropë. Kemi parë një ngritje të konsiderueshme të punësimit dhe të pagave. Kemi parë përmirësime të ndjeshme. Reformat e zbatuara për të rritur transparencën janë përmirësuar. Në sektorin financiar progresi ka qenë i konsiderueshëm, janë përmirësuar kapacitetet institucionale të BQK-së. Kosova është vendi i parë që ka zbatuar instrumentin RSF, falë masave. Autoritetet kanë arritur të lansojnë projekte të mëdha që do të rrisin ndjeshëm. Jemi të gatshëm për të ofruar mbështetje të vazhdueshme për të ndritur të ardhmen”, ka thënë Amaglobeli.
Gjatë konferencës, Ministri i Financave, Punës dhe Transfereve, Hekuran Murati, theksoi se Kosova ishte shteti i parë në rajon që përfitoi nga instrumenti RSF, i cili mbështet shtetet me performancë të mirë. Përmes këtij programi, Kosova ka mundur të lansojë ankandin për energjinë e erës dhe atë diellore, si dhe të finalizojë miratimin e Ligjit për Energjinë e Ripërtritshme.
Nga ana tjetër, Programi SBA ndihmoi në ruajtjen e stabilitetit makroekonomik dhe përshpejtimin e reformave për një rritje të qëndrueshme dhe gjithëpërfshirëse. Përmbushja e objektivave të këtyre programeve i mundëson Kosovës të përfitojë pjesën e mbetur të fondeve: 16 milionë euro nga SBA dhe 10 milionë euro nga RSF.
Tutje, thuhet se shefi i Misionit të FMN-së përmendi rritjen e punësimit dhe të pagave, uljen e inflacionit në 1.6%, si dhe uljen e borxhit publik nën nivelin 17%. Gjithashtu, ai theksoi stabilitetin e sektorit financiar në Kosovë si dhe rritjen e transparencës nga BQK.
“Se BQK ka performuar me përkushtim të lartë, u konfirmua edhe nga Guvernatori i BQK-së, Z. Ahmet Ismaili, i cili tha se ky institucion ka siguruar stabilitet financiar dhe ka realizuar objektivat strukturore dhe indikative”, thuhet mes tjerash në njoftim.
Ministri Murati, Shefi i Misionit të FMN-së Amaglobeli dhe Guvernatori Ismaili shprehën mirënjohje të ndërsjellë për angazhimin dhe bashkëpunimin e suksesshëm deri më tani, dhe theksuan se ky bashkëpunim do të vazhdojë edhe në të ardhmen. /Katror.info
Përgatiti:
