Kuvendi Komunal i Prishtinës po mban sot një seancë të jashtëzakonshme, e cila ka nisur nga ora 10:00, me të vetmen pikë të rendit të ditës: propozim-vendimin për lënien në shqyrtim publik të draftit të Planit Zhvillimor Komunal (PZHK) për periudhën 2025-2033, shkruan Katror.info.
Ky draft, që tashmë ka marrë 28 komente negative nga Ministria e Mjedisit, Planifikimit Hapësinor dhe Infrastrukturës, është kritikuar ashpër për shkelje procedurale dhe për përmbajtje të dëmshme për zhvillimin e qëndrueshëm të qytetit. Sipas vlerësimeve të ministrisë, dokumenti parashikon zgjerim të pakontrolluar të zonave ndërtimore, prekje të tokave bujqësore me vlerë dhe rrezikim të zonave të mbrojtura ujore.
Në shenjë kundërshtimi, Grupi i Asambleistëve të Lëvizjes VETËVENDOSJE! ka bërë të ditur se nuk do të marrë pjesë në këtë mbledhje, duke e cilësuar si një proces joligjor dhe të dëmshëm për të ardhmen e kryeqytetit. Ata u kanë bërë thirrje edhe përfaqësuesve të tjerë politikë që ta bojkotojnë seancën dhe të mos legjitimojnë një plan që, sipas tyre, është hartuar me nxitim dhe pa përfshirjen e qytetarëve.
Mundesh me e lexu edhe…
Kundërshtime të forta ndaj këtij procesi kanë shprehur edhe aktivistët qytetarë, deputetja, Eliza Hoxha dhe Dardan Sejdiu, ish-nënkryetar i Prishtinës.
Eliza Hoxha, përmes një reagimi të gjatë publik, ka shprehur zhgënjimin e saj për mënyrën si po trajtohet e ardhmja urbane e qytetit. Ajo theksoi se plani zhvillimor nuk duhet të reduktohet në numra ndërtimi, por të reflektojë nevojat e qytetarëve për hapësira të gjelbra, infrastrukturë sociale dhe urbane që garanton cilësi jete. “Me një plan të tillë, Prishtina do bëhet një strehimore kolektive pa ajër, pa frymë, pa gëzim e pa dritë,” shkroi ajo.
Ndërsa Dardan Sejdiu, në reagimin e tij, e quajti këtë seancë një përsëritje të tentimeve të mëparshme për miratimin e PZHK-së në fund të mandatit, pa transparencë dhe pa konsultim publik. “Nëse Komuna beson që ky plan është i drejtë, le ta kalojnë pas zgjedhjeve, me mandat të ri prej qytetarëve,” theksoi ai.
Thirrja e kësaj seance në mënyrë të papritur dhe mungesa e konsultimit me publikun ka nxitur një sërë reagimesh edhe nga qytetarë e grupe të interesit, të cilët e shohin procesin si të fshehtë dhe të motivuar nga interesa të ngushta./Katror.info
Përgatiti:
