Në ambientet e Parkut të Inovacionit dhe Trajnimeve (ITP) në Prizren, është lansuar zyrtarisht Qendra Evropiane e Inovacionit Digjital (EDIH) – “Digital Innovation Gateway for Kosovo” (DIG-4K), një nismë që shënon një hap të rëndësishëm drejt avancimit të agjendës së transformimit digjital të Kosovës.
DIG-4K synon mbështetjen e ndërmarrjeve mikro, të vogla dhe të mesme (NMVM), si dhe organizatave publike, duke u ofruar atyre qasje në teknologji të avancuar, ekspertizë të specializuar dhe infrastrukturë esenciale për zhvillimin dhe përmirësimin e konkurrueshmërisë në tregun digjital.
Kjo qendër është bashkëfinancuar nga Bashkimi Evropian, në kuadër të Programit “Digital Europe”, dhe Qeveria e Kosovës, përmes Ministrisë së Ekonomisë.
Mundesh me e lexu edhe…
Gjatë ceremonisë lansuese, ministrja në detyrë e Ekonomisë, Artane Rizvanolli, theksoi rëndësinë e bashkëpunimit strategjik në realizimin e vizionit për një Kosovë digjitale. Ajo potencoi se DIG-4K do të shërbejë si një pikë kyçe për përshpejtimin e transformimit teknologjik në vend.
Nga ana tjetër, AnnaCarin Platon, përfaqësuese nga zyra e BE-së në Kosovë, ritheksoi përkushtimin e Bashkimit Evropian për mbështetjen e Kosovës në integrimin në tregun unik digjital evropian. Ajo vlerësoi DIG-4K si një platformë konkrete për avancim dhe bashkëpunim rajonal.
Duke folur në emër të ITP Prizren, Drejtori Ekzekutiv Muhamed Rexhepi shprehu përkushtimin e këtij institucioni për të nxitur inovacionin dhe zhvillimin teknologjik në Kosovë. “ITP është shtëpia ideale për një qendër si DIG-4K, që synon të sjellë risi dhe mundësi të reja për ekosistemin digjital të vendit,” tha ai.
Ngjarja u përmbyll me hapjen zyrtare të thirrjes për aplikime për NMVM-të që duan të përfitojnë nga shërbimet e DIG-4K, duke u ofruar atyre një mundësi të re për të përshpejtuar proceset e tyre të digjitalizimit dhe për të kontribuar në zhvillimin ekonomik të vendit./RTKlive/Katror.info
