“Kjo përvojë më mësoi se puna sociale nuk ka të bëjë me të ndihmuarit thjesht duke dhënë, por me fuqizimin e njerëzve për të krijuar ndryshimin vetë”, thotë Leila Ali, drejtoresha ekzekutive e Isla Internships Abroad, e cila në një intervistë për Katror.info të shënuar Ditën Botërore të Punës Sociale, ndan rrugëtimin e saj në fushën e punës sociale dhe përvojën e saj në Kosovë.
Leila Ali, drejtoresha ekzekutive e Isla Internships Abroad, një organizatë që bashkëpunon me OJQ vendore dhe universitete ndërkombëtare për të sjellë studentë në Kosovë për t’i angazhuar ata në projekte të të drejtave të njeriut dhe zhvillimit të qëndrueshëm, ka ndarë përvojën e saj në Ditën Botërore të Punës Sociale me Katror.info.
Rrugëtimi i Leilës në fushën e punës sociale nisi kur ajo erdhi në Kosovë në vitin 2016 përmes Korpusit të Paqes, një program vullnetar 2.5-vjeçar që bashkëpunon me qeverinë amerikane. Gjatë kësaj periudhe, ajo jetoi me familje vendase në Doberçan dhe Topanicë, duke punuar në shkolla lokale për të kontribuar në zhvillimin e arsimit. Kjo periudhë formoi bazat e saj për angazhimin në punën sociale dhe theksoi rëndësinë e ndihmës dhe zhvillimit në nivel lokal.
Pas përfundimit të misionit me Korpusin e Paqes, Leila fitoi një bursë për të ndjekur studimet master në Punë Sociale në SHBA, duke u fokusuar në Zhvillimin Ndërkombëtar dhe Komunitar. Ky përkushtim për t’u thelluar në fushën e punës sociale e çoi atë të rikthehej në Kosovë pas diplomimit, ku vazhdoi të kontribuonte në zhvillimin dhe përparimin e shoqërisë.
Në Ditën Botërore të Punës Sociale, Leila reflekton mbi rëndësinë e marrëdhënieve njerëzore dhe ndikimin e punës sociale për ndryshime pozitive. Puna e saj me Isla Internships Abroad është një shembull i përkushtimit të vazhdueshëm ndaj drejtësisë sociale dhe zhvillimit të qëndrueshëm. Përmes projekteve që angazhojnë studentë në Kosovë, ajo promovon të drejtat e njeriut dhe krijon mundësi për ndryshime të qëndrueshme.
Puna e Leilës dhe kontributi i saj janë një dëshmi e forcës së lidhjeve ndërkombëtare dhe angazhimit për të mbështetur zhvillimin dhe përparimin e shoqërive lokale, duke synuar një të ardhme më të drejtë dhe të barabartë për të gjithë.
Çfarë ju inspiroi të ndiqni një karrierë në punën sociale?
Si fëmijë i parë i një familjeje emigrante, Leila ka përjetuar sfidat që shoqërojnë nisjen e një jete të re në një vend të panjohur. Ajo ka qenë dëshmitare e vështirësive që prindërit e saj kaluan gjatë periudhës së emigrimit, dhe ky përvojë ka ndikuar në formimin e qëllimit të saj profesional.
“Këto përvoja formësuan një ndjenjë të thellë empatie tek unë dhe një dëshirë të palëkundur për të sjellë ndryshim domethënës. Gjithmonë kam thënë: ‘Dua të jem personi që më duhej mua kur isha duke u rritur.’ Unë e dija që doja të sfidoja padrejtësitë, të avokoja për të tjerët dhe të përdorja zërin tim për të ngritur ata që kishin nevojë më së shumti”, thotë Leila.
Leila Ali ndan një histori që e ka formësuar thellësisht qasjen e saj ndaj punës sociale.
“Një nga momentet që ndryshoi mënyrën se si e shihja këtë profesion ishte udhëtimi im i parë si vullnetare në Haiti. Punova me një organizatë lokale që mbështeste fëmijët që kishin humbur familjet e tyre, dhe një nga rregullat kryesore ishte që nuk na lejohej t’u jepnim atyre asgjë. Fillimisht, e pata të vështirë ta kuptoja. Për mua, ndihma ishte e lidhur gjithmonë me dhënien ushqim, rroba, apo çfarëdo tjetër që mund të ndaja.
Por më pas e kuptova thelbin e kësaj qasjeje. Nuk ishim atje për të qenë ‘shpëtimtarë’ apo për të zgjidhur problemet nga jashtë. Ndryshimi i vërtetë duhej të vinte nga brenda komunitetit. Ishin liderët dhe organizatat vendore ato që duhej të kishin rolin kryesor, në mënyrë që zgjidhjet të ishin të qëndrueshme. Kjo përvojë më mësoi se puna sociale nuk ka të bëjë me të ndihmuarit thjesht duke dhënë, por me fuqizimin e njerëzve për të krijuar ndryshimin vetë”, thotë ajo.
Esenca e kësaj qasje tregon kuptimin thelbësor të punës sociale dhe që ndikimi më i madh nuk vjen nga ndihma e momentit, por nga krijimi i kushteve qe i lejojnë komunitetet të ndërtojnë një të ardhme më të mirë.
Leila Ali e konsideron si sfidën më të madhe në punën e saj si punonjëse sociale dëshirën e fortë për të ndihmuar të tjerët, e cila, nëse nuk menaxhohet siç duhet, mund të çojë në lodhje dhe djegie profesionale
Puna sociale kërkon shumë angazhim emocional dhe fizik, dhe Leila ka mësuar rëndësinë e balancës. Ajo e kujton shpesh një shprehje që e udhëheq në këtë fushë: “Nuk mund të derdhësh nga një gotë bosh.”
Prandaj, ajo konsideron që një punonjës social duhet të ketë prioritet veten, vendosjen e kufijve dhe kujdesin për mirëqenien e tij për të mundur të vazhdojë të ofrojë mbështetje efektive për të tjerët.
Leila beson se balanca mes angazhimit për të ndihmuar dhe ruajtjes së vetëkujdesit është thelbësore për të parandaluar djegien profesionale dhe për të ruajtur efikasitetin në punën e saj.
Leila Ali e ka parë se si ka evoluar perceptimi për punën sociale ndër vite
Në fillim, punonjësit socialë janë parë kryesisht si ata që ofrojnë ndihmë të drejtpërdrejtë për individë apo familje, por ajo e di se puna sociale është shumë më e gjerë se kaq.
“Ndryshimet e para në këtë proces evoluimi kanë qenë pikërisht perceptimi mbi punën sociale dhe rolin që ajo ka në shoqëri. Me rritjen e ndërgjegjësimit global për krizat dhe sfidat që përballen komunitetet, është bërë e qartë se puna sociale është shumë më tepër se asistencë e drejtpërdrejtë – ajo përfshin gjithashtu fushat e arsimit, politikës, ligjit dhe avokimit. Sot, punonjësit socialë ndikojnë jo vetëm tek individët, por edhe në nivelin e komunitetit dhe strukturave më të gjera shoqërore”, tha ajo.
Ajo, duke punuar në nivelin strukturor, ka parë se sa e rëndësishme është kjo transformim dhe ndikimi që puna sociale mund të ketë në ndryshimin e shoqërisë në shkallë globale.
Leila Ali tregon për mënyrat se si puna sociale mund të transformojë komunitetet
Ajo tregon që, puna sociale është një mjet fuqizimi. Sipas saj, secili individ ka potencialin për të qenë një agjent ndryshimi, dhe roli i punonjësve socialë është të mbështesin njerëzit për të njohur forcën dhe aftësitë e tyre.
Ndryshimi i qëndrueshëm, shton ajo, nuk vjen nga zgjidhje të imponuara nga jashtë, por nga vetë komuniteti.
“Përmes punës sociale, ndihmojmë njerëzit dhe komunitetet të kuptojnë se mjetet për ndryshim janë tashmë në duar të tyre. Kur ata ndihen të fuqizuar dhe të motivuar, ata mund të bëhen kampionë të ndryshimit dhe të kontribuojnë për një komunitet më të drejtë dhe të barabartë.”
“Çdo individ ka potencialin për të qenë një agjent ndryshimi, dhe roli ynë nuk është të ‘rregullojmë’ gjërat për ta, por t’i mbështesim në njohjen e forcës dhe aftësive të tyre. Ndryshimi i qëndrueshëm nuk vjen nga zgjidhjet e imponuara nga jashtë, por nga brenda vetë komunitetit”, thotë ajo.
Në shumë raste, ne flasim pak për shëndetin fizik dhe mendor të punonjësve socialë, por Leila Ali beson se kujdesi për veten është thelbësor në këtë profesion kërkues
Sipas saj, një nga mësimet më të rëndësishme që ka mësuar është se vendosja e kufijve është e domosdoshme.
Ajo thekson se zakonet e vogla, por të rëndësishme, si të flasësh pozitivisht me veten, të krijosh kohë për pushim dhe të mbështetesh te kolegët në komunitetin e punës sociale, janë elemente që e ndihmojnë të qëndrojë e fortë.
Për më tepër, ajo pranon që nuk mund të bëjë gjithçka, por se çdo kontribut, qoftë dhe më i vogli, ka rëndësi dhe është një burim motivimi për të vazhduar pa u ndjerë e mbingarkuar.
Si një punonjëse sociale, Leila Ali vë theksin edhe mbi rëndësinë e bashkëpunimit me profesionistë të tjerë në punën e saj të përditshme
Ajo beson se bashkëpunimi është një nga shtyllat kryesore të punës sociale. Sipas saj, asnjë individ apo organizatë nuk mund të përballojë të gjitha nevojat e një komuniteti vetëm.
“Ndikimi i vërtetë ndodh kur edukatorët, profesionistët e shëndetësisë, politikëbërësit dhe liderët lokalë punojnë së bashku për të krijuar zgjidhje gjithëpërfshirëse dhe efektive”, shtoi ajo.
Në rolin e saj aktual, Leila bashkëpunon me shumë OJQ në Kosovë për të kuptuar më mirë misionet dhe projektet e tyre. Ajo shfrytëzon këto partneritete për të avokuar për punën e tyre dhe për të sjellë studentë nga e gjithë bota për të mbështetur nismat lokale. Ky bashkëpunim është thelbësor për të siguruar ndikimin afatshkurtër dhe qëndrueshmërinë afatgjatë të projekteve sociale.
Në punën e saj, Leila Ali ka zbatuar disa praktika inovative, të cilat janë thelbësore për zhvillimin e qëndrueshëm të komunitetit dhe ndihmën e individëve
Një nga qasjet më të theksuara është lidhja e punës sociale me mësimin ndërkombëtar përmes eksperiencës praktike.
Siç thekson ajo, “Nëpërmjet rolit tim, kam ndihmuar në krijimin e mundësive për studentët që të angazhohen me OJQ lokale, duke kontribuar në projekte kuptimplota, ndërsa fitojnë përvojë praktike.”
Ky lloj angazhimi ofron mundësi për të rritur aftësitë e studentëve dhe për t’i përgatitur ata për sfidat që do të ndeshen në të ardhmen, duke lidhur teorinë me praktikën në një mënyrë të drejtpërdrejtë dhe të dobishme.
Gjithashtu, Leila ka punuar në zhvendosjen e fokusit nga bamirësia e drejtpërdrejtë në ndërtimin e kapaciteteve afatgjata.
“Në vend që studentët të vijnë si zgjidhës afatshkurtër të problemeve, ne theksojmë bashkëpunimin me liderët lokalë për periudha të zgjatura. Kjo siguron që komunitetet të jenë në qendër të zhvillimit të tyre. Ky ndryshim në qasje është një hap i rëndësishëm në ndihmën e komunitetit për të qenë më të pavarur dhe të fuqizuar për të menaxhuar sfidat që përballen”, thekson ajo.
Historitë personale të ndryshimit janë për Leilën një mënyrë kyçe për të matur ndikimin e punës së saj, ajo beson se ndikimi nuk mund të matet vetëm me shifra
Për Leilën, ndikimi më i madh është i dukshëm kur shohim pasqyrat e afatgjata të punës së saj, ku OJQ-të forcojnë kapacitetet e tyre, komunitetet fitojnë burime dhe studentët vazhdojnë të bëjnë punë domethënëse.
Siç ajo shprehet, “Kur shohim OJQ-të që forcojnë kapacitetet e tyre, komunitetet që fitojnë burime dhe studentët që vazhdojnë të bëjnë punë domethënëse, dimë që kemi krijuar ndryshim të qëndrueshëm.”
Ky është një shembull i përpjekjeve për të siguruar një ndikim të qëndrueshëm dhe transformues për komunitetet dhe individët që ndihmohen.
Në Ditën Ndërkombëtare të Punës Sociale, Leila Ali ka një mesazh inspirues për punonjësit e rinj dhe studentët e Punës Sociale:
“Puna sociale është një rrugë e ngarkuar me sfida, por gjithashtu është një nga profesionet më shpërblyese. Do të ketë momente të vështira, kur do të duket se progresi është shumë i ngadaltë dhe ndikimi i pamjaftueshëm. Por mos harroni, çdo përpjekje ka rëndësi. Edhe veprimet më të vogla mund të krijojnë valë ndryshimi që zgjasin. Qëndroni të pasionuar dhe të fortë, sepse bota ka nevojë për ju”, përfundon ajo. /Katror.info
Përgatiti:
