Kënga “Let It Snow” (Le të bjerë borë) është pjesë e rregullt e festave të Krishtlindjes, ashtu si këngët “Rudolph the Red-Nosed Reindeer”, White Christmas, “Last Christmas” ose “All I Want for Christmas Is You.”
Por, ndryshe nga ato këngë, “Let It Snow” bashkë me “Jingle Bells, ”Frosty the Snowman”, “Winter Wonderland, “Sleigh Ride,” ose “Jingle Bell Rock,” edhe pse nuk kanë referenca festive, ato po ashtu janë standarde gjatë festave rreth Krishtlindjes.
“Let It Snow” megjithatë është ndër këngët më popullore të Krishtlindjeve dhe një nga dhjetë këngët më të mira të festave të të gjitha kohërave edhe pse kënga nuk ka të bëjë aspak me asnjë festë. Në mënyrë paradoksale, një valë vape në Kaliforni gjatë korrikut 1945 frymëzoi shkrimin e këngës.
Mundesh me e lexu edhe…
Sipas librit “Stories Behind Greatest Hits of Christmas” nga Ace Collins, kompozitorët dhe tekstshkruesit, Jule Styne dhe Sammy Cahn e shkruan këngën në një ditë vape të korrikut në Hollywood.
Kënga nuk kishte të bëjë me Krishtlindjet, por ishte thjesht një këngë romantike për arratisjen nga moti i ftohtë, e cila për ironi u frymëzua nga arratisja nga moti i ngrohtë në Kaliforni.
Ata donin t’i shpëtonin temperaturave të larta dhe imagjinuan një vend ose mot shumë më të freskët.
Kjo ishte ideja nga e cila lindi “Let It Snow!”. Jule Styne dhe tekstshkruesi Sammy Cahn, amerikant të gjeneratës së parë të lindur nga emigrantët hebrenj, nuk menduan se kënga e tyre do të bëhet njëra ndër sinonimet e festave të Krishtlindjeve.
Cahn Filloi me vargjet e para dhe Styne u përgjigj me melodi, ata vërtiteshin në dhomën e nxehtë duke u flladitur me këngën që e shkruanin për ditë të ftoh ta,dhe doli “Let It Snow, Let It Snow, Let It Snow”, si ishte titulli origjinal.
Nuk është vetëm një nga këngët më të njohura dhe më të suksesshme të të gjitha kohërave, por është një model i shkrimit të mirë të këngëve. Melodia e gëzueshme është e mrekullueshme, lirika po ashtu, si në shumë këngë të tjera të mira, teksti përreth i jep kuptim titullit duke e vendosur atë me një histori specifike dhe të qartë.
Kënga këndon për dy të dashuruar të bllokuar në shtëpi nga një stuhi bore, të cilët bashkohen mbi zjarr të ngrohtë dhe kokoshka. Ashtu siç thoshte teksti:
“The weather outside is frightful /But the fire is so delightful /And since we’ve no place to go / Let It Snow Let It Snow Let It Snow”.
(Moti jashtë është i frikshëm / Por zjarri është kaq i lezetshëm / Dhe meqenëse nuk kemi ku të shkojmë / Le të bjerë borë! Le të bjerë borë! Le të bjerë borë!)
Kënga ishte menduar të jetë edhe argëtuese. Në kohën kur u shkrua “Let It Snow”, në kulturën popullore çdo përmbajtje seksuale duhej të fshihej me sugjerime dhe përfundime. Pra, vargu i dytë rrëshqet “The lights are turned way down low” dhe vazhdon, “When we finally kiss goodnight” (Dritat janë janë dobësuar / Kur më në fund puthemi për natën e mirë).
Në përgjithësi, këngë e shkruar shumë bukur, nga dy autorë mjeshtër të këngëve, që meriton statusin e saj si një klasik i Krishtlindjeve, edhe pse nuk përmenden Krishtlindjet ose ndonjë festë tjetër në këngë.
Kënga u incizua me titullin “Let It Snow, Let It Snow, Let It Snow” për herë të parë nga Vaughn Monroe dhe u publikua pas Ditës së Falënderimeve në 1945. Ajo u bë hit i madh deri në Krishtlindje po atë vit. Vaughn Monre ishte një këngëtar bariton, trumpetist dhe udhëheqës i Big Band, Ai ka dy yje në Hollywood Walk of Fame, një për albume dhe një për performancë në radio. Për gjeneratat më të reja versioni origjinal i Vaughn Monroe kur ai hyri për herë të parë në tabelën e Billboard më 22 dhjetor 1945, mund të dëgjohet në filmat aksion të viteve 1980 – 90, “Die Hard” me Bruce Willis. Por historia e këngës nuk mbaron me aq.
Ashtu siç ndodh me shumë këngë të famshme festash, “Let It Snow” është trajtuar nga disa prej emrave më të mëdhenj të industrisë së muzikës. Përpara se Dean Martin të regjistronte versionin e tij ikonik në vitin 1966 që konsiderohet si versioni klasik i këngës, Frank Sinatra publikoi këngën e tij në vitin 1950.
Dean Martin regjistroi disa këngë Krishtlindjesh gjatë karrierës së tij të gjatë dhe të suksesshme si dhe një album të shkëlqyer pushimesh dimërore “A Winter Romance” (Një romancë dimërore), në 1959 ku për herë të parë ai e incizoi këngën me titull “Let it snow, Let it snow, Let it Snow”. Ky ishte album sezonal në kuptimin e plotë të fjalës, pasi siç sugjeron vetë titulli i saj, është një koleksion me melodi me temë dimri që përfshin në mënyrë të pashmangshme edhe disa këngë Krishtlindjesh. Martin, kishte vokali të qetë bariton dhe sipas Bing Crosby ai kishte zërin perfekt për këngët festive. Versioni i tij i “Let It Snow” i cili u shkurtua për album, është përshtatja më e mirë dhe më e njohur e një kënge që është bërë një klasik absolut i Krishtlindjeve.
Edhe tani pas gjashtë dekada e gjysmë, është e pamundur të mposhtet versioni i vitit 1959. Në dekadat e fundit, Doris Day, Jesicca Simpson, Rod Stewart, Jewel dhe shumë të tjerë i kanë kënduar versionet e tyre. Disa artistë kanë gjetur mënyra krijuese për ta bërë këngën klasike të tingëllojë e freskët, në 2005. Carly Simon lëshoi një version nga këndvështrimi i mikpritësit të festës në vend të të ftuarit.
Kënga u bë aq ikonike sa që u interpretua në stile të ndryshme. Kate Rusby (folk), Louie Bellson (xhaz), Aaron Neville (soul), Randy Travis (country), Twisted Sister (heavy metal), Jeremih dhe Chance The Rapper (hip-hop) dhe Michael Bublé (pop). Edhe vetë Martinit i pëlqeu aq shumë, sa që ai ri-regjistroi një version në vitin 1966, si pjesë e albumit të Krishtlindjeve The Dean Martin.
Pasi shkruan një nga këngët dimërore më të njohura të të gjitha kohërave, Cahn dhe Styne të cilët më vonë fituan bashkë pesë çmime Oskar bashkuan sërish forcat për të shkruar një melodi rreth nostalgjisë për motin më të ngrohtë “The Things We Did Last Summer” (Gjërat që bëmë verën e kaluar). Kënga mbështetet në kujtimet e lumtura të verës për të kaluar më lehtë muajt e dimrit – një përmbysje e situatës që frymëzoi “Let It Snow”. “The Things We Did Last Summer” ishte një hit në Top 10 kur u publikua në 1946 dhe që atëherë është kënduar nga Dean Martin, Frank Sinatra, Bing Crosby dhe The Beach Boys.
Madhështia e Dean Martin (King Of The Cool) qëndron në sharmin e tij të lehtë, zërin e qetë dhe aftësinë për t’u lidhur me audiencën. Muzika e tij, e mbushur me ngrohtësi, romancë dhe humor, vazhdon të magjeps dëgjuesit edhe sot. Kontributet e tij në argëtim, qoftë përmes këngëve, filmave apo shfaqjeve televizive, kanë lënë një ndikim të përjetshëm në kulturën e popullarizuar.
Dean Martin ishte 78 vjeç kur vdiq, më 25 dhjetor, ditën Krishtlindjes1995, nga problemi me frymëmarrje në shtëpinë e tij në Beverly Hills. Regjisori Peter Bogdanovich citohet të ketë thonë “Fakti që Dean Martin vdiq në ditën e Krishtlindjeve ishte lloji i humorit të zi që ai mund të kishte bërë”, duke pas parasysh se Martin ishte edhe aktor dhe komedian ndër më të mirët të gjeneratës së tij. Megjithatë, shpirti i Martinit vazhdon dhe Krishtlindjet nuk do të ishin të njëjta pa këngët e tij. Pra “Let It Snow! – Le të bjerë borë! dhe gëzuar Krishtlindjet./Katror.info
Përgatiti:
