Prishtina përjetoi një mbrëmje të paharrueshme operistike nën qiellin e hapur, përballë Bibliotekës Kombëtare – një skenë unike që u shndërrua në një tempull të muzikës klasike falë Festivalit Ndërkombëtar të Operës Rame Lahaj.
Në qendër të kësaj nate të veçantë ishte sopranoja në ngjitje ndërkombëtare, Marigona Qerkezi, e cila, e shoqëruar nga pianistja Jess Rucinski, solli një repertor të pasur dhe emocional, që nga eleganca e Bellinit deri te ritmet dinamike të Bernstein. Zëri i saj i fuqishëm dhe interpretimi plot ndjeshmëri pushtuan çdo cep të hapësirës dhe zemrat e të pranishmëve.
Surpriza më e madhe e mbrëmjes erdhi me bashkimin në skenë të Marigonës me tenorin e njohur dhe themeluesin e festivalit, Rame Lahaj. Interpretimi i tyre i duetit nga opera Tosca e Giacomo Puccinit solli një kulm artistik që emocionoi thellë publikun dhe u shpërblye me ovacione të gjata.
Mundesh me e lexu edhe…
Kjo mbrëmje ishte një dëshmi tjetër e fuqisë së artit për të ngritur shpirtin dhe për të bashkuar njerëzit. Me një atmosferë që i ngjante skenave më prestigjioze botërore, Rame Lahaj International Opera Festival vazhdon të afirmohet si një ngjarje që lartëson kulturën operistike në Kosovë dhe më gjerë./Katror.info
