Filharmonia e Kosovës dhuroi një përjetim të paharrueshëm për adhuruesit e muzikës klasike me koncertin e së premtes, duke sjellë elegancën e repertorit francez dhe madhështinë e Mozartit.
Nën dirigjimin e mjeshtrit Marco Crispo, orkestra solli një program të kuruar me mjeshtëri që preku zemrat e publikut.
Këtë e bëri të ditur Filharmonia e Kosovës përmes një postimi në rrjetet sociale.
Mundesh me e lexu edhe…
Mbrëmja u karakterizua nga një ekuilibër i përsosur mes pasionit dhe finesës, ku në skenë shkëlqyen solistët Liza Kerob (violinë) dhe Altin Tafilaj (violë).
Dyshja interpretoi me një ndjeshmëri të jashtëzakonshme ‘Simfoninë koncertante’ të Wolfgang Amadeus Mozartit, një vepër që shquhet për dialogun e ndërlikuar mes dy instrumenteve solo dhe orkestrës.
Në vijim të koncertit, publiku pati rastin të përjetojë bukurinë dhe delikatesën e muzikës franceze me vepra nga kompozitorët e shquar Lili Boulanger, Gabriel Fauré dhe Maurice Ravel.
Kulmi i mbrëmjes erdhi me interpretimin e suitës ‘Ma Mère l’Oye’ të Ravelit, në 150-vjetorin e lindjes së këtij gjeniu të muzikës impresioniste. Performanca e orkestrës e dha këtë vepër me një ndjeshmëri të thellë dhe ngjyra të pasura muzikore, duke krijuar një atmosferë magjike në sallë.
Për adhuruesit e muzikës klasike, Filharmonia e Kosovës ka rezervuar një tjetër mbrëmje të veçantë.
Më 5 Prill 2025, nga ora 19:30, në Atelienë e Pallatit të Rinisë në Prishtinë, orkestra do të sjellë një program të dedikuar kompozitorit amerikan Philip Glass. Nën dirigjimin e Gregory Charette dhe me violinistin belg-amerikan Max Haft si solist.
Një sezon i pasur muzikor vazhdon të mbushë skenën e kryeqytetit me momente të paharrueshme për artdashësit. /Katror.info
Përgatiti:
