Nga 18 prilli, të gjithë tregtarët me pakicë në Maqedoninë e Veriut – përfshirë marketet, barnatoret dhe dyqanet e teknikës dhe mobileve – do të jenë të detyruar të publikojnë çmimet e produkteve në faqet e tyre zyrtare.
Kjo masë vjen si pjesë e ndryshimeve në Ligjin për Mbrojtjen e Konsumatorëve, të miratuara në Kuvend dhe të shpallura në Gazetën Zyrtare më 4 mars, shkruan Katror.
Ministria e Ekonomisë, brenda afatit 45-ditor, ka përgatitur një Rregullore që përcakton detyrimet për tregtarët e vegjël, të mesëm dhe të mëdhenj që ushtrojnë veprimtari me pakicë.
Mundesh me e lexu edhe…
Sipas Rregullores, “tregtari i vogël, i mesëm dhe i madh që kryen veprimtari tregtare me pakicë në përputhje me Klasifikimin kombëtar të veprimtarive i publikon çmimet e mallrave që plason në treg në ueb faqen e tyre në mënyrë të qartë dhe të qasshme, përmes një pjese të veçantë të ueb-faqes së tregtarit të dedikuar për çmimet.”
Publikimi duhet të jetë i qasshëm pa nevojë për regjistrim dhe të përmbajë të gjitha të dhënat e përcaktuara në Shtojcën e Rregullores – përfshirë çmimin aktual të shitjes, çmimin për njësi, si dhe çdo zbritje apo çmim promocional.
Në rast të ofertave me zbritje, duhet të shënohet çmimi i rregullt, përqindja dhe shuma e uljes, si dhe periudha kohore e vlefshmërisë së promocionit.
Çmimet duhet të përditësohen çdo ditë deri në orën 10:00. Në rast gabimesh teknike, tregtarët kanë afat 24 orë për korrigjimin e tyre./Katror.info
