Në një hap historik për sportin kosovar, Federata e Basketbollit të Kosovës ka lansuar politikat e para gjithëpërfshirëse për mbrojtjen në sport.
Projekti “Safeguarding the Future”, i mbështetur nga Erasmus+, solli 13 dokumente udhëzuese për mbrojtje dhe integritet – të përputhshme me ligjet e Kosovës dhe standardet ndërkombëtare .
Në bashkëpunim me partnerë ndërkombëtarë nga Estonia, Bullgaria dhe Shoqata e Trajnerëve të Basketbollit të Kosovës, këto politika u lansuan zyrtarisht në Forumin “Mbrojtja fillon me ne”, i cili u mbajt në Bibliotekën Kombëtare të Kosovës në Prishtinë.
Mundesh me e lexu edhe…
Elvira Dushku, Koordinatore e Projektit/Sekretare e FBK shpjegon:
“Janë një politikë-mbrojtje dhe 12 dokumente të tjera përcjellëse të cilat e spjegojnë në detaje secilin veprim të secilit akter që është i përfshirë në një ndeshje të basketbollit. Kështu nuk po i atakojmë trajnerët, vetëm prindërit, vetëm zyrtarët, nuk po e atakojmë askënd, është e rëndësishme për neve që të gjithë të përfshirët me e ditë se si me u sill edhe me qenë të mbrojtur secili prej tyre.”
Qëllimi kryesor i këtyre dokumenteve është të shërbejnë si udhërrëfyes për ndërtimin e një kulture të re sportive në Kosovë.
Mimika Dobroshi – Koordinatore e Zyrës së Erasmus+ për Kosovën flet për projektin.
“Ky projekt e ka ni rëndësi të veçantë, për herë të parë një entitet sportiv, në këtë rast FBK është si koordinatore e projektit Erasmus+, kjo është me të vërtetë një kënaqësi për ne si zyre e Erasmus+ me e pasë këtë sukses në Kosovë po edhe në anën tjeter është sukses i veçantë për komunitetin e sportit në përgjithësi.”
Në forum u prezentua edhe lansimi i platformës për raportim online ku u sqaruan konceptet kyçe dhe parimet e mbrojtjes, mënyrat e raportimit dhe trajtimit të rasteve të mundshme të abuzimit apo shqetësimit.
Vlora Braha – Zyrtare për Integritet dhe mbrojtje në FBK e quan sukses këtë nismë.
“Kjo është një arritje shumë e madhe për komunitetin e basketbollit, sepse si prindi, si trajneri, si lojtari, lojtarja, e të tjerë, e dijnë që janë të mbrojtur, e dijnë që ka një bazë zyrtare, ligjore, që i mbron ata. Në anën tjetër, në prezentimin tim u përqendrova edhe në pjesën se qysh shkon procesi i hetimit të një rasti, kush ka me u marrë me atë dhe me çfarë lloj sanksionesh mundet me u përballë dikush në rast se kemi ndonjë parregullsi.”
“Këtu kemi çështjet e bullizmit, e neglizhencës, ngacmimeve seksuale, abuzimet, kjo platforma online ka me qenë ajo që ka me ua dhanë taman një drejtim gjanave.”
Këto politika të mbrojtjes forcojnë besimin, transparencën dhe llogaridhënien në marrëdhëniet mes pjesëmarrësve në sport.
Granit Rugova, Drejtor i Programeve dhe Projekteve Zhvillimore në FBK flet për rrugëtimin.
“Ka qenë punë, ka qenë rrugëtim shumë i gjatë, me shumë sfida, mirëpo kur angazhimi nuk mungon, kur dëshira është shumë e madhe çdo gjë është e arritshme.”
“Një gjë e tillë është obligative, edhe nga FIBA edhe nga EU, herët a vonë të gjitha federatata duhen ta bëjnë një gjë të tillë, tani edhe ato e kanë më të lehtë sepse e kanë një model se qysh është punuar, secilën prej tyre e inkurajoj ta vazhdojë, sepse çdo individ, çdo sportist duhet të ndihet i sigurt në vendin ku e praktikon atë sport.”
Motoja “Mbrojtja fillon me ne” përfaqëson jo vetëm emrin e forumit, por edhe angazhimin e vazhdueshëm të komunitetit të basketbollit për të ndërtuar një sport më të drejtë, më të ndershëm dhe më të sigurt për të gjithë./Katror.info
